ప్రయాగ్రాజ్లోని మోతీలాల్ నెహ్రూ మెడికల్ కాలేజీ (MLNMC)లో జరిగిందని చెబుతున్న ఒక ఆందోళనకరమైన వీడియో సోషల్ మీడియాలో వైరల్ అవుతోంది. ఇది భారతదేశంలోని ఉన్నత విద్యాసంస్థల్లో ఇంకా కొనసాగుతున్న “ర్యాగింగ్” సంస్కృతిపై చర్చను మళ్ళీ తెరపైకి తెచ్చింది.
తమను ర్యాగింగ్ చేస్తున్నారని ఆరోపిస్తూ ఒక జూనియర్ విద్యార్థిని ఈ వీడియోను రికార్డ్ చేసింది. అందులో ఇద్దరు సీనియర్ విద్యార్థినులు సదరు జూనియర్తో చాలా కోపంగా, దూకుడుగా వాదించడం కనిపిస్తోంది. వెనుక వరుసలో తోటి విద్యార్థినులు గోడకు ఆనుకుని మౌనంగా నిలబడి ఉన్నారు. “దీదీ, నేను దీనిని రికార్డ్ చేస్తున్నాను. ఎందుకంటే నేను ఫిర్యాదు చేసేటప్పుడు, మీరు నా వేలిని విరిచారని (Ungli Modi Hai) నిరూపించడానికి నాకు ఆధారం కావాలి” అని వీడియో తీస్తున్న విద్యార్థిని చెప్పడం వినిపిస్తోంది. “వీరు నా బ్యాచ్ విద్యార్థులను నాపైకి రెచ్చగొడుతున్నారు” అని ఆమె ఆవేదన వ్యక్తం చేసింది.
ఈ వీడియో యొక్క ప్రామాణికతను స్వయంగా ధృవీకరించలేకపోయినప్పటికీ, నెటిజన్లు మాత్రం నిందితులపై కఠిన చర్యలు తీసుకోవాలని డిమాండ్ చేస్తున్నారు. “ర్యాగింగ్ అనేది ఒక నేరం. జూనియర్లను ర్యాగింగ్ చేసేవారు నేరస్తులే. ప్రయాగ్రాజ్ పోలీసులు మరియు కాలేజీ యాజమాన్యం ఈ ఘటనపై వెంటనే స్పందించి చర్యలు తీసుకోవాలి” అని ఎక్స్ (X) ప్లాట్ఫారమ్లో ఒక వినియోగదారుడు కామెంట్ చేశారు.
మరికొందరు నెటిజన్లు నిందితులను కాలేజీ నుండి బహిష్కరించాలని డిమాండ్ చేస్తున్నారు. “వీరిని యూనివర్సిటీ నుండి బహిష్కరించడమే కాకుండా, ఐదేళ్ల పాటు ఏ కోర్సులోనూ చేరకుండా నిషేధించాలి” అని ఒకరు రాశారు. “ర్యాగింగ్ వల్ల ఎంతోమంది ప్రతిభావంతులైన విద్యార్థులు ప్రాణాలు కోల్పోయారు. తల్లిదండ్రులకు కడుపు కోత మిగిలింది. గూండాయిజంలో ర్యాగింగ్ కూడా ఒక రూపమే” అని మరొకరు ఆగ్రహం వ్యక్తం చేశారు.
చాలా మంది వినియోగదారులు ఈ వీడియోను రీషేర్ చేస్తూ, భారతదేశంలో ర్యాగింగ్కు వ్యతిరేకంగా కఠిన చర్యలు తీసుకోకపోవడం వల్లే ఇది అనివార్యంగా మారుతోందని అభిప్రాయపడ్డారు. “ఏ మార్పు రాదు, కేవలం విషయాలు బయటకు రాకుండా తొక్కిపెడుతున్నారు. ర్యాగింగ్కు పాల్పడే వారి అకడమిక్ రికార్డులను సీజ్ చేసి బయటకు గెంటేయాలి” అని కొందరు ఘాటుగా స్పందించారు.
ఒక వినియోగదారుడు తన పాత అనుభవాన్ని గుర్తు చేసుకుంటూ.. “2004లో నేను హాస్టల్లో ఉన్నప్పుడు ఎవరూ ర్యాగింగ్ను ఎదిరించలేదు. అసభ్యకరమైన చేష్టలు మరియు శబ్దాలు చేయనని నేను ఒక్కడినే మొండిగా నిలబడ్డాను. ఇప్పుడు ఒక విద్యార్థిని ఇంత ధైర్యంగా ఎదురు తిరగడం చూస్తుంటే సంతోషంగా ఉంది” అని పోస్ట్ చేశారు.
ఈ MLNMC ఘటన ఒక్కటే కాదు, కొద్దిరోజుల క్రితమే గ్రేటర్ నోయిడాలోని ఒక ప్రైవేట్ యూనివర్సిటీలో కూడా హాస్టల్ గదిలో ఒక విద్యార్థినిని తోటి విద్యార్థులు దుర్భాషలాడుతూ, చెంపదెబ్బ కొట్టిన వీడియో వెలుగులోకి వచ్చింది. ఆ యూనివర్సిటీ నిందితురాలిని సస్పెండ్ చేసి విచారణకు ఆదేశించింది. ప్రతిష్టాత్మక విద్యాసంస్థలు కూడా ఈ విషపూరిత ర్యాగింగ్ సంస్కృతి నుండి విముక్తి పొందలేకపోతున్నాయని ఈ ఘటనలు గుర్తు చేస్తున్నాయి.