గుజరాత్లోని రాజ్కోట్ జిల్లాలో మద్యం అలవాటు ఉన్న తన కొడుకుని కన్నతల్లిదండ్రులే యాసిడ్ తాగించి, గొంతు నులిమి హత్య చేశారు. ఈ ఘటన గత నెల జూన్ 30న జరిగింది. మొదట్లో ఇది ఆత్మహత్యగా చిత్రీకరించే ప్రయత్నం చేసినప్పటికీ, పోస్టుమార్టం నివేదికలో అసలు నిజం బయటపడింది.
పూర్తి వివరాలు: రాజ్కోట్ జిల్లా, గోండల్ తాలూకాలోని గుండాలా గ్రామానికి చెందిన 23 ఏళ్ల యువకుడు రామ్ బాబూభాయ్ బంభవాకు మద్యం తాగే అలవాటు ఉంది. దీనివల్ల అతనికి తండ్రి బాబూభాయ్ మరియు తల్లి మనీషాబెన్తో నిత్యం గొడవలు జరుగుతుండేవి. జూన్ 30న మద్యం విషయంలో గొడవ ముదరడంతో, తల్లి బలవంతంగా కొడుక్కి యాసిడ్ తాగించగా, తండ్రి అతడిని కొట్టి, గొంతు నులిమి హత్య చేశాడు.
ఆత్మహత్యగా నమ్మించేందుకు ప్రయత్నం: ఈ హత్యను ఆత్మహత్యగా చిత్రీకరించేందుకు నిందితుడైన తండ్రి బాబూభాయ్, స్థానిక రాజకీయ నాయకుల ద్వారా గోండల్ సివిల్ ఆసుపత్రిలో పోస్టుమార్టం త్వరగా పూర్తయ్యేలా ప్రయత్నించాడు. అయితే, పోలీసులు లోతుగా విచారణ చేపట్టడంతో అసలు కుట్ర బయటపడింది. పోస్టుమార్టం నివేదికలో ఇది ముమ్మాటికీ హత్యేనని తేలింది.
పోలీసుల అరెస్టు: మృతుడి భార్య బంశీబెన్ బంభవా, వీరి వివాహం జరిగి కేవలం నాలుగు నెలలే అవుతోంది. తన అత్తమామల పై గోండల్ తాలూకా పోలీస్ స్టేషన్లో ఆమె ఫిర్యాదు చేసింది. ఆమె ఫిర్యాదు మేరకు బాబూభాయ్ మరియు మనీషాబెన్లను పోలీసులు అరెస్టు చేశారు. మృతుడు రామ్ బంభవా ఇద్దరు తోబుట్టువులలో పెద్దవాడు, అతని తండ్రి టీ కొట్టు నడుపుతుంటారు. ఈ కేసును పిఐ యు.ఆర్. దామోర్ దర్యాప్తు చేస్తున్నారు.