ఐపీఎల్ 2026 సీజన్ ముగిసింది. గత ఆదివారం (మే 31) ఫైనల్ మ్యాచ్ జరిగింది. సీజన్ ముగిసిన మూడు రోజుల తర్వాత ఒక షాకింగ్ వార్త బయటకు వచ్చింది. ముంబై ఇండియన్స్ (MI) ఫ్రాంచైజీ తమకు పూర్తి జీతం చెల్లించలేదని న్యూజిలాండ్ స్టార్ ఆల్రౌండర్ మిచెల్ సాంట్నర్ తీవ్ర ఆరోపణలు చేశారు.
ఏం జరిగింది? సాంట్నర్ను ముంబై ఇండియన్స్ రూ. 2 కోట్ల ధరకు రిటైన్ చేసుకుంది. అయితే, గాయం కారణంగా అతను ఈ సీజన్లో పూర్తి మ్యాచ్లు ఆడలేకపోయాడు. ముంబై యాజమాన్యం తనకు సగం జీతం మాత్రమే ఇచ్చిందని సాంట్నర్ పేర్కొన్నాడు. మరోవైపు, గాయం పేరుతో అతను ఐపీఎల్ నుంచి తప్పుకుని, న్యూజిలాండ్ టెస్ట్ జట్టులో చేరాడని గతంలో ఆరోపణలు వచ్చాయి. దీనిపై సాంట్నర్ స్పష్టత ఇచ్చాడు.
రెండుసార్లు గాయపడ్డ సాంట్నర్: ‘గ్రేడ్ క్రికెటర్ పాడ్కాస్ట్’లో సాంట్నర్ మాట్లాడుతూ, తన గాయాల గురించి వివరించాడు. రెండో బిడ్డ పుట్టడం వల్ల మొదటి మ్యాచ్ ఆడలేకపోయానని, ఆ తర్వాత ఢిల్లీతో జరిగిన మ్యాచ్లో తన కుడి భుజానికి గాయమైందని చెప్పాడు. కోలుకుని తిరిగి వచ్చిన తర్వాత, ఎడమ భుజానికి కూడా గాయం కావడంతో ఈ సీజన్లో కేవలం 4 మ్యాచ్లు మాత్రమే ఆడగలిగానని తెలిపాడు.
సగం జీతమే ఇచ్చారు: “నేను జట్టు కోసం నా శరీరాన్ని రిస్క్లో పెట్టి ఆడాను, కానీ అది వారు గుర్తించలేదు” అని సాంట్నర్ వాపోయాడు. తన ఒప్పందం ప్రకారం రావాల్సిన రూ. 2 కోట్లలో కేవలం సగం మాత్రమే చెల్లించారని, ఇది తనకు అస్సలు నచ్చలేదని అతను పేర్కొన్నాడు.
ఐపీఎల్ నిబంధనలు ఏమని చెబుతున్నాయి? ఐపీఎల్ నిబంధనల ప్రకారం, ఒక ఆటగాడు సీజన్ మధ్యలో గాయపడితే, ఆ ఆటగాడికి కాంట్రాక్ట్ ప్రకారం పూర్తి నగదు చెల్లించాల్సి ఉంటుంది. అయితే, కొన్ని సందర్భాల్లో జీతాలు వాయిదాల పద్ధతిలో అందుతాయి. ఈ ఆరోపణలపై ముంబై ఇండియన్స్ ఫ్రాంచైజీ నుండి ఇప్పటివరకు ఎటువంటి అధికారిక ప్రకటన రాలేదు.