పోలాండ్‌లోని స్వెంటోక్లోవిస్ నగరంలో 15 ఏళ్ల వయసులో అదృశ్యమైందని భావించిన ఒక మహిళ, 27 ఏళ్ల తర్వాత అదే ఇంట్లో అత్యంత దయనీయ స్థితిలో ప్రాణాలతో బయటపడింది.
గత జూలై నెలలో ఒక అపార్ట్‌మెంట్ నుండి వింత శబ్దాలు వస్తున్నాయని పొరుగువారు పోలీసులకు సమాచారం అందించారు. అక్కడికి చేరుకున్న పోలీసులు, 42 ఏళ్ల మిరెలా అనే మహిళను చూసి షాక్‌కు గురయ్యారు. ఆమె కేవలం ఎముకల గూడులా మారి, చావుబతుకుల మధ్య ఉండటాన్ని వారు గమనించారు.
పోలీసు అధికారి అన్నా హరినియాక్ మాట్లాడుతూ.. “మొదట ఆ మహిళ అంతా బాగుందని చెప్పింది. కానీ ఆమె శరీరంపై ఉన్న గాయాలు, ఆమె పరిస్థితి చూస్తే దీర్ఘకాలంగా చిత్రహింసలకు గురైనట్లు స్పష్టమైంది” అని తెలిపారు. మిరెలా చివరిసారిగా 1998లో (ఆమెకు 15 ఏళ్ల వయసులో) బయట ప్రపంచానికి కనిపించింది. ఆమె ఇంటి నుండి పారిపోయిందని అందరినీ నమ్మించారు. కానీ నిజానికి గత 27 ఏళ్లుగా ఆమెను ఆ ఇంట్లోని ఒక చిన్న గదిలో బంధించి ఉంచారు.
ఈ సుదీర్ఘ కాలంలో ఆమె కనీసం బయట ప్రపంచాన్ని కూడా చూడలేదు. గుర్తింపు కార్డు (ID) కూడా లేని ఆమెను ప్రపంచానికి సంబంధం లేకుండా చేసేశారు. వైద్య పరీక్షల్లో ఆమె తీవ్రమైన పోషకాహార లోపం మరియు ఇన్ఫెక్షన్లతో బాధపడుతున్నట్లు తేలింది. ప్రస్తుతం ఆమె కోలుకోవడానికి సోషల్ మీడియా ద్వారా నిధులు సేకరిస్తున్నారు. ఇలాంటిదే మరో ఘటన బ్రెజిల్‌లో కూడా వెలుగుచూసింది, అక్కడ ఒక 6 ఏళ్ల బాలికను పుట్టినప్పటి నుండి చీకటి గదిలో బంధించి ఉంచారు.