భాగల్పూర: బీహార్‌లోని భాగల్పూర్‌లో గుండెను హత్తుకునే ఒక సంఘటన వెలుగులోకి వచ్చింది. ఖాకీ యూనిఫాంలో ఉన్న మానవత్వాన్ని చాటిచెప్పే వీడియో ఒకటి సోషల్ మీడియాలో వైరల్ అవుతోంది. గంగా నదిపై ఉన్న విక్రమశిల వంతెన నుండి దూకి ఆత్మహత్య చేసుకోబోతున్న ఒక మహిళను, ఆమె పసిబిడ్డను ‘డైల్ 112’ పోలీసులు కేవలం కొన్ని సెకన్ల వ్యవధిలో కాపాడారు.
అసలేం జరిగింది?
విక్రమశిల వంతెనపై ఒక మహిళ తన ఒడిలో చిన్నారిని పట్టుకుని ఏడుస్తూ రైలింగ్ వద్దకు చేరుకుంది. ఆమె మానసిక స్థితిని చూస్తే ఆత్మహత్య చేసుకోబోతున్నట్లు స్పష్టంగా అర్థమైంది. ఆమె నదిలోకి దూకడానికి సిద్ధపడుతున్న తరుణంలో, అక్కడ గస్తీ నిర్వహిస్తున్న ‘డైల్ 112’ బృందం కంటపడింది.
‘రియల్ లైఫ్’ హీరో సబ్ ఇన్‌స్పెక్టర్ సికిందర్ పాశ్వాన్
ఆ క్లిష్ట సమయంలో సబ్ ఇన్‌స్పెక్టర్ సికిందర్ పాశ్వాన్ అసాధారణమైన సమయస్ఫూర్తిని ప్రదర్శించారు. ఆ మహిళను భయపెట్టకుండా, చాలా నిదానంగా ఆమె దగ్గరకు వెళ్లి మాటల్లో దింపారు. ఆమెను ఆత్మీయంగా పలకరిస్తూనే, ఒక్క క్షణంలో ఆమెను మరియు బిడ్డను గట్టిగా పట్టుకుని రైలింగ్ నుండి దూరంగా లాగారు.
కేవలం 38 సెకన్ల వ్యవధిలో జరిగిన ఈ రెస్క్యూ ఆపరేషన్ చూసి అక్కడున్న వారు ఊపిరి పీల్చుకున్నారు. కేవలం ప్రాణాలు కాపాడటమే కాకుండా, మానసిక వేదనలో ఉన్న ఆ మహిళకు పోలీసులు ధైర్యాన్ని నూరిపోశారు.
సోషల్ మీడియాలో ప్రశంసల జల్లు
ఈ భావోద్వేగపూరితమైన వీడియో ఇప్పుడు ఇంటర్నెట్‌లో విపరీతంగా షేర్ అవుతోంది. నెటిజన్లు బీహార్ పోలీసుల మానవత్వాన్ని కొనియాడుతున్నారు. “ఖాకీ దుస్తుల వెనుక కూడా ఒక మృదువైన హృదయం ఉంటుంది, అది ఆపదలో ఉన్నవారిని సొంత మనుషుల్లా ఆదుకుంటుంది” అని నెటిజన్లు కామెంట్స్ చేస్తున్నారు. సికిందర్ పాశ్వాన్ చూపిన తెగువకు అందరూ సెల్యూట్ చేస్తున్నారు.
“ఒక తల్లి తనతో పాటు బిడ్డ ప్రాణాలను కూడా ముగించాలని నిర్ణయించుకున్నప్పుడు, ‘డైల్ 112’ ఒక ఆశాకిరణంలా నిలిచింది. ఇద్దరి జీవితాలను ఆరిపోకుండా కాపాడిన SI సికిందర్ పాశ్వాన్‌కు జైహింద్!”