భారతదేశంలో ప్రస్తుతం 10 కోట్ల మందికి పైగా మధుమేహంతో బాధపడుతున్నారు. మధుమేహం అనేది కేవలం ఒక పదార్థంతో తగ్గిపోయేది కాదు, ఇది క్రమబద్ధమైన జీవనశైలి మార్పులతో నిర్వహించాల్సిన సమస్య.
అపోహ 1: చక్కెర ఎక్కువగా తింటే నేరుగా మధుమేహం వస్తుంది.
నిజం: కేవలం చక్కెర మాత్రమే కారణం కాదు. ప్రాసెస్ చేసిన ఆహారం, అనారోగ్యకరమైన కొవ్వులు తీసుకోవడం వల్ల బరువు (ముఖ్యంగా పొట్ట దగ్గర కొవ్వు) పెరుగుతుంది. దీనివల్ల ఇన్సులిన్ రెసిస్టెన్స్ ఏర్పడి టైప్-2 డయాబెటిస్ వచ్చే అవకాశం ఉంటుంది.
అపోహ 2: పండ్లలో చక్కెర ఉంటుంది కాబట్టి వాటిని అస్సలు తినకూడదు.
నిజం: పండ్లలో సహజమైన ఫ్రక్టోజ్ ఉన్నప్పటికీ, వాటిలో ఫైబర్, విటమిన్లు, యాంటీఆక్సిడెంట్స్ పుష్కలంగా ఉంటాయి. పండ్ల రసాల కంటే పండును నేరుగా తినడం మేలు. మితంగా తీసుకోవడం వల్ల రక్తంలో చక్కెర స్థాయిలు అకస్మాత్తుగా పెరగవు.
అపోహ 3: చక్కెర కంటే బెల్లం, తేనె చాలా మంచివి.
నిజం: బెల్లం, తేనె, పంచదార.. ఈ మూడూ కార్బోహైడ్రేట్లే. బెల్లంలో ఖనిజాలు ఉన్నప్పటికీ, ఇవన్నీ రక్తంలో చక్కెర స్థాయిని వేగంగా పెంచుతాయి. కాబట్టి డయాబెటిస్ ఉన్నవారు వీటిని కూడా పరిమితంగానే వాడాలి.
అపోహ 4: అన్నం పూర్తిగా మానేయాలి.
నిజం: అన్నం పూర్తిగా మానేయాల్సిన పనిలేదు. అయితే అన్నంతో పాటు రోటీ వంటి ఇతర కార్బోహైడ్రేట్లు కలపకూడదు. అన్నంతో పాటు తగినంత ప్రోటీన్ (పప్పు, పెరుగు) మరియు పీచు పదార్థం (కూరగాయలు) ఉండేలా చూసుకోవాలి. ఇది ‘గ్లైసెమిక్ లోడ్’ను తగ్గిస్తుంది.
అపోహ 5: షుగర్-ఫ్రీ స్వీట్లు ఎంతైనా తినవచ్చు.
నిజం: ‘షుగర్-ఫ్రీ’ అని లేబుల్ ఉన్నంత మాత్రాన అవి ఆరోగ్యకరం అని అర్థం కాదు. వాటిలో కొవ్వులు, క్యాలరీలు ఎక్కువగా ఉండవచ్చు. వీటిని ఎక్కువగా తింటే బరువు పెరిగే ప్రమాదం ఉంది.
అపోహ 6: మెంతి, నేరేడు పండు లేదా దాల్చినచెక్క మధుమేహాన్ని నయం చేస్తాయి.
నిజం: ఏ ఒక్క ఆహార పదార్థం కూడా మధుమేహాన్ని శాశ్వతంగా నయం చేయదు. ఇవి ఆహారానికి అదనపు పోషక విలువలను ఇస్తాయి తప్ప, మందులకు ప్రత్యామ్నాయం కావు.
అపోహ 7: కేవలం ఊబకాయం ఉన్నవారికి మాత్రమే డయాబెటిస్ వస్తుంది.
నిజం: సన్నగా ఉన్నవారికి కూడా టైప్-2 డయాబెటిస్ రావచ్చు. అంతర్గత అవయవాల చుట్టూ పేరుకుపోయే కొవ్వు (Visceral Fat) వల్ల ఇన్సులిన్ రెసిస్టెన్స్ ఏర్పడుతుంది. దీనిని ‘లీన్ డయాబెటిస్’ అంటారు.
అపోహ 8: మూలికలు లేదా ప్రత్యేక డైట్లతో డయాబెటిస్‌ను నయం చేయవచ్చు.
నిజం: ప్రస్తుతానికి మధుమేహానికి శాశ్వత నివారణ (Cure) లేదు. కొన్ని సందర్భాల్లో బరువు తగ్గి, జీవనశైలి మార్చుకోవడం ద్వారా ‘రెమిషన్’ (Remission) సాధించవచ్చు, అంటే మందులు లేకుండా చక్కెర స్థాయిని నియంత్రించవచ్చు. కానీ ఇది డాక్టర్ల పర్యవేక్షణలోనే జరగాలి.