రాజ్గఢ్: మధ్యప్రదేశ్ రాజ్గఢ్ జిల్లా ఖిల్చీపూర్ పరిధిలోని ఛీపీపురా గ్రామంలో ఒళ్లు గగుర్పొడిచే గృహ హింస ఉదంతం వెలుగులోకి వచ్చింది. అన్నం వడ్డించడంలో కొద్దిగా ఆలస్యమైందనే కోపంతో ఒక ఉన్మాద భర్త తన భార్యపై చేసిన అరాచకాలు వింటే ఎవరికైనా రక్తం మరిగిపోతుంది. ఆ క్రూరుడు తన భార్యను కర్రలతో విచక్షణా రహితంగా కొట్టడమే కాకుండా, ఆమె మెడలో భారీ ఇనుప గొలుసు వేసి తాళం పెట్టి, ఇంటి అరుగు (అంగన్) స్తంభానికి కట్టేసాడు.
24 గంటల పాటు బందీగా ఉంచి.. కాల్చిన ఇనుప రాడ్తో దాడి:
బాధితురాలు మాంగీ బాయి తన్వర్ తెలిపిన వివరాల ప్రకారం.. జూన్ 10వ తేదీ మధ్యాహ్నం ఆమె భర్త సర్దార్ సింగ్ తన్వర్ పూర్తి మత్తులో ఇంటికి వచ్చాడు. చిన్న వివాదం కాస్తా పెద్దది అవ్వడంతో ఆమెను 24 గంటల పాటు ఇంట్లోనే బందీగా ఉంచాడు. ఈ క్రమంలో నిందితుడు క్రూరత్వానికి పరాకాష్టగా గ్యాస్ స్టవ్ వెలిగించి, దానిపై ఇనుప రాడ్ను ఎర్రగా కాల్చి.. మహిళ కాళ్లు, నడుము సహా శరీరంలోని పలు భాగాలపై వాతలు పెట్టాడు. ఆమె నొప్పితో గిలగిలా కొట్టుకుంటూ గట్టిగా అరిస్తే.. ఆ అరుపులు బయటకు వినపడకుండా నోరు నొక్కేసాడు. “ఇప్పుడు చూస్తా నువ్వు పోలీసుల దగ్గరకు ఎలా వెళ్తావో” అంటూ బెదిరింపులకు దిగాడు.
మెడలో గొలుసుతోనే అడవి గుండా 6 కిలోమీటర్ల నడక:
ఈ భయానక బంధీఖానా నుండి ఎలాగోలా తప్పించుకోవడానికి ఆ మహిళకు ఒక అవకాశం దొరికింది. స్తంభానికి ఉన్న తాళాన్ని ఎలాగోలా పగలగొట్టి, మెడలో ఇనుప గొలుసు, తాళం వేలాడుతుండగానే అడవి మార్గం గుండా దాదాపు 6 కిలోమీటర్లు కాలినడకన ప్రయాణించింది. రాత్రి 10 గంటల ప్రాంతంలో ఆమె తీవ్ర భయాందోళనలతో, అపస్మారక స్థితిలో ఖిల్చీపూర్ పోలీస్ స్టేషన్కు చేరుకుంది. ఆమె మెడలో గొలుసు, తాళం చూసి అక్కడ డ్యూటీలో ఉన్న పోలీసులు సైతం ఒక్కసారిగా షాక్కు గురయ్యారు. 10 ఏళ్ల క్రితం పెళ్లయిన మాంగీ బాయికి ఒక బాబు పుట్టాడు. అయితే ఆ బాబు 3 నెలల వయసులోనే చనిపోవడంతో, అప్పటి నుండి భర్త ఆమెతో తరచూ గొడవ పడేవాడని తెలిసింది.
ఉన్మాద భర్త అరెస్ట్:
ఖిల్చీపూర్ పోలీస్ స్టేషన్ ఇన్ఛార్జ్ కమల్ సింగ్ గెహ్లాట్ మాట్లాడుతూ.. పోలీసులు తక్షణమే స్పందించి ముందుగా బాధితురాలికి వైద్య పరీక్షలు (Medical Test) చేయించారని తెలిపారు. మహిళ ఇచ్చిన ఫిర్యాదు ఆధారంగా పలు తీవ్రమైన సెక్షన్ల కింద కేసు నమోదు చేసి, నిందితుడైన భర్త సర్దార్ సింగ్ తన్వర్ను అరెస్ట్ చేసినట్లు వెల్లడించారు.
Leave a Reply