“మేక చేను మేసిందని ఇంతటి ఉన్మాదమా..? చిన్న విషయంతో మొదలైన గొడవ చివరకు కత్తిపోట్లతో ముగిసింది..! ఒక్క మాటతో మొదలైన వివాదం.. యువకుడి పట్ల ఇంతటి ఘాతుకమా..!!!”

బీహార్‌లోని ముజఫర్‌పూర్ జిల్లాలో మేక పంట చేను మేసిందన్న చిన్న వివాదం చివరకు హత్యకు దారితీసింది.

సెప్టెంబర్ 20, ఆదివారం సాయంత్రం 40 ఏళ్ల సంతోష్ కుమార్ సాహ్ అనే వ్యక్తికి చెందిన మేక సమీపంలోని పంట పొలంలోకి వెళ్లినట్లు సమాచారం. దీంతో పొలం యజమానికి, సంతోష్‌కి మధ్య తీవ్ర వాగ్వాదం జరిగింది.

ఆ వాగ్వాదం కాస్తా పెరిగి ఘర్షణగా మారింది. ఈ క్రమంలో అవతలి వ్యక్తులు ఇంట్లోంచి కత్తి తీసుకొచ్చి సంతోష్‌పై దాడి చేశారని అతని కుటుంబ సభ్యులు ఆరోపించారు. సంతోష్ ఛాతీపై విచక్షణారహితంగా పలుమార్లు పొడవడంతో, ఆయన శరీరమంతా దాదాపు డజనుకు పైగా కత్తిపోట్లు పడినట్లు సమాచారం. తీవ్రంగా గాయపడిన అతడిని కుటుంబ సభ్యులు వెంటనే శ్రీ కృష్ణ మెడికల్ కాలేజ్ ఆసుపత్రికి తరలించారు. అయితే, అప్పటికే ఆయన మృతి చెందినట్లు వైద్యులు ధృవీకరించారు.

సమాచారం అందుకున్న పోలీసులు సంఘటనా స్థలానికి చేరుకుని దర్యాప్తు ప్రారంభించారు. ఈ ఘటనకు సంబంధించి ఇద్దరిపై కేసు నమోదు చేశామని, ఘటన తర్వాత నిందితులు పరారయ్యారని పోలీసులు తెలిపారు. వారిని పట్టుకునేందుకు గాలింపు చర్యలు ముమ్మరం చేశారు. మృతి చెందిన సంతోష్ మేస్త్రీగా, సెంట్రింగ్ కాంట్రాక్టర్‌గా పనిచేసేవాడని, ఆయనకు ఇద్దరు కుమారులు, ఇద్దరు కుమార్తెలు మొత్తం నలుగురు పిల్లలు ఉన్నారని తెలిసింది.

మేక పొలంలోకి వెళ్లిందన్న చిన్న కారణంతో మొదలైన వాగ్వాదం ప్రాణం తీసే స్థాయికి చేరడం స్థానికంగా తీవ్ర దిగ్భ్రాంతిని కలిగించింది. ఈ ఘటనతో గ్రామంలో ఉద్రిక్త పరిస్థితులు నెలకొన్నాయి. పోలీసులు ఘటనా స్థలాన్ని పరిశీలించి, ఫోరెన్సిక్ బృందం సహాయంతో సమగ్ర దర్యాప్తు కొనసాగిస్తున్నారు.