బ్రిటిష్ పర్యాటకుడు లూయిస్ పుల్మాన్ మేఘాలయను “అట్టర్ స్కామింగ్ స్టేట్” (అతిపెద్ద మోసపూరిత రాష్ట్రం) అని వెటకారంగా పిలుస్తూ చేసిన ఒక ట్రావెల్ వీడియో ప్రస్తుతం ఇంటర్నెట్లో వైరల్ అవుతోంది. అయితే, ఇది విమర్శ కాదు, తన పట్ల ఎంతో ప్రేమను, ఆతిథ్యాన్ని ప్రదర్శించిన మేఘాలయ ప్రజలకు ఆయన అందించిన అద్భుతమైన నివాళి.
ఇన్స్టాగ్రామ్లో షేర్ చేసిన ఈ వీడియోలో, పుల్మాన్ మొదట తోటి ప్రయాణికులను హెచ్చరిస్తున్నట్లు కనిపిస్తారు. “నేను మేఘాలయలో మూడు వారాలు గడిపాను. ఇదొక మోసపూరిత రాష్ట్రమని తేలింది, నేను ఎదుర్కొన్న మూడు అతిపెద్ద మోసాల గురించి మీకు చెప్తాను జాగ్రత్త” అని అంటారు.
కానీ వీడియో ముందుకు సాగేకొద్దీ, ఆయన మాటల్లోని చమత్కారం అర్థమవుతుంది. మేఘాలయ ప్రజల నిస్వార్థ సేవను, ఉదారతను వివరించడానికి ఆయన ఈ ‘రివర్స్ సైకాలజీ’ని ఉపయోగించారు.
ఆయన ఎదుర్కొన్న ‘మూడు పెద్ద మోసాలు’:
- డబ్బు తీసుకోని గైడ్: ఒక ట్రెకింగ్ గైడ్ తనతో ఏడు గంటల పాటు గడిపి, చీకటి పడ్డాక తన ఇంటికి తీసుకెళ్లి భోజనం పెట్టాడని, తీరా డబ్బు ఇస్తుంటే ఒక్క రూపాయి కూడా తీసుకోలేదని పుల్మాన్ వివరించారు. “ఒప్పందం ప్రకారం డబ్బు ఇస్తానన్నా అతను తీసుకోలేదు, ఇదేం మోసం?” అంటూ సరదాగా వాపోయారు.
- మూడు రోజుల ఆతిథ్యం: లిఫ్ట్ అడిగితే ఒక జంట ఆపి, పది నిమిషాల్లోనే టీ తాగుదామని ఇంటికి తీసుకెళ్లారని పుల్మాన్ చెప్పారు. అది కాస్తా మూడు రోజుల బసగా మారిందని, వారు అద్భుతమైన భోజనం పెట్టి, రెండు రాత్రులు పడక సౌకర్యం కల్పించి పంపించారని ఆయన తెలిపారు.
- సహాయం చేయడానికి ఎప్పుడూ సిద్ధం: ప్రయాణంలో ఒంటరిగా ఉండి నా కష్టాలు నేను పడదామన్నా ఎవరూ వదలడం లేదని, ఏ కారు వెళ్లినా ఆపి లిఫ్ట్ ఇస్తారా అని అడుగుతున్నారని ఆయన జోక్ చేశారు.
వీడియో చివరలో, మేఘాలయ అందాలకు, అక్కడి ప్రజల మనసులకు ఫిదా అయిపోయానని, “మేఘాలయ.. నువ్వు నిజంగా నమ్మశక్యం కాని దానివి. ఐ లవ్ యూ” అంటూ ముగించారు.
నెటిజన్ల స్పందన:
ఈ వీడియోపై సోషల్ మీడియాలో నెటిజన్లు రకరకాలుగా స్పందిస్తున్నారు:
- ఒక వినియోగదారు, “నీకు భోజనం పెట్టిన వ్యక్తి మేఘాలయ మంత్రులలో ఒకరు” అని కామెంట్ చేశారు.
- మరొకరు, “భారతదేశం గురించి మంచి విషయాలు చెబితే రీచ్ రాదు, అందుకే ఇతడు ఈ ‘క్లిక్బైట్’ ట్రిక్ వాడాడు” అని రాశారు.
- “నాకు కూడా ఇలాంటి మోసాలే కావాలి” అని మరికొందరు సరదాగా వ్యాఖ్యానించారు.