సమాజవాదీ పార్టీ వ్యవస్థాపకుడు ములాయం సింగ్ యాదవ్ చిన్న కుమారుడు, బీజేపీ నాయకురాలు అపర్ణా యాదవ్ భర్త ప్రతీక్ యాదవ్ కన్నుమూశారు. బుధవారం తెల్లవారుజామున ప్రతీక్ ఆరోగ్యం అకస్మాత్తుగా క్షీణించడంతో ఆయన మరణించారు. కుటుంబ సభ్యుల కథనం ప్రకారం.. ఆయన గత కొంతకాలంగా ఊపిరితిత్తుల సమస్యతో బాధపడుతున్నారు మరియు బ్లడ్ క్లాటింగ్ (రక్తం గడ్డకట్టడం) కోసం చికిత్స పొందుతున్నారు.
రాత్రి సమయంలో పరిస్థితి విషమించడంతో ఆయన్ను లక్నోలోని సివిల్ ఆస్పత్రికి తరలించారు, అక్కడ వైద్యులు ఆయన అప్పటికే మరణించినట్లు (బ్రాట్ డెడ్) ప్రకటించారు. ఆస్పత్రికి తీసుకువచ్చే సమయానికే ఆయన శరీరంలో ఎలాంటి జీవక్రియలు లేవని ఆస్పత్రి యంత్రాంగం తెలిపింది.
మేదాంతలో చికిత్స, అర్థరాత్రి క్షీణించిన ఆరోగ్యం
కుటుంబ వర్గాల సమాచారం ప్రకారం.. ప్రతీక్ యాదవ్ ఏప్రిల్ 30న మేదాంత హాస్పిటల్లో చేరారు. అక్కడ మూడు రోజుల పాటు చికిత్స పొందారు. ఆ సమయంలోనే ఆయన ఎడమ కాలికి శస్త్రచికిత్స జరిగింది. మేదాంత ఆసుపత్రిలోని ఇంటర్నల్ మెడిసిన్ విభాగం డాక్టర్ రచితా శర్మ పర్యవేక్షణలో ఆయనకు ఊపిరితిత్తుల ఎంబోలిజం (Embolism) చికిత్స జరుగుతోంది. మూడు రోజుల తర్వాత డిశ్చార్జ్ అయినప్పటికీ, ఆయన కాలికి వాపు తగ్గలేదు. దీనివల్ల ఆయన బయటకు రావడం మానేశారు.
మంగళవారం రాత్రి 11:30 గంటల ప్రాంతంలో ప్రతీక్ ఆరోగ్యం క్షీణించింది. డ్రైవర్ మరియు సిబ్బంది సాయంతో సివిల్ ఆస్పత్రికి తీసుకెళ్లారు. అక్కడ గంటసేపు చికిత్స పొంది ఇంటికి తిరిగి వచ్చారు. అయితే, బుధవారం తెల్లవారుజామున 5 గంటలకు మళ్లీ ఫోన్ రావడంతో సివిల్ ఆస్పత్రి సిబ్బంది ఆయన ఇంటికి వెళ్లారు. అప్పటికే ఆయన స్పందించని స్థితిలో ఉండటంతో 5:55 గంటలకు ఆస్పత్రికి తరలించారు. ఈసీజీ తీయగా శ్వాస ఆగిపోయినట్లు తేలింది. ప్రతీక్ మరణించే సమయంలో అపర్ణా యాదవ్ లక్నోలో లేరు, ఆమె అస్సాం పర్యటనలో ఉన్నారు.
పోస్ట్మార్టం నివేదికలో ఏముంది?
ప్రతీక్ యాదవ్ మరణానికి కారణం ‘కార్డియో రెస్పిరేటరీ కొలాప్స్’ (Cardiorespiratory Collapse) అని, దీనికి ప్రధాన కారణం ‘మాసివ్ పల్మనరీ థ్రోంబోఎంబోలిజం’ (Massive Pulmonary Thromboembolism) అంటే ఊపిరితిత్తులలో పెద్ద రక్తం గడ్డకట్టడం అని పోస్ట్మార్టం రిపోర్టులో తేలింది.
అయితే, ఈ నివేదికలో ఆయన శరీరంపై ఉన్న 6 గాయాల గుర్తుల గురించి చర్చ జరుగుతోంది. ఛాతి, చేతులు మరియు మణికట్టుపై గాయాలు ఉన్నాయి. ఈ గాయాల కింద రక్తం గడ్డకట్టినట్లు (Ecchymosis) గుర్తించారు. ఈ గాయాలన్నీ ‘యాంటిమార్టం’ (Antemortem) అంటే మరణానికి ముందే తగిలినవని వైద్యులు స్పష్టం చేశారు. కొన్ని గాయాలు 7 నుండి 10 రోజుల పాతవి కాగా, మరికొన్ని ఒకరోజు ముందు తగిలినవని నివేదిక పేర్కొంది.
అఖిలేష్ యాదవ్ స్పందన
పోస్ట్మార్టం హౌస్ వద్దకు చేరుకున్న అఖిలేష్ యాదవ్ మాట్లాడుతూ.. “నేను అతన్ని చిన్నప్పటి నుండి చూశాను. ఆరోగ్యం మరియు ఫిట్నెస్ పట్ల చాలా శ్రద్ధగా ఉండేవాడు. చాలా మంచి అబ్బాయి. రెండు నెలల క్రితం కలిసినప్పుడు ఆరోగ్యం జాగ్రత్త అని చెప్పాను. వ్యాపారంలో నష్టాలు మనిషిని కృంగదీస్తాయి. చట్టపరమైన ప్రక్రియలు పూర్తయ్యాక కుటుంబ సభ్యులు కోరుకున్నట్లు చేస్తాం” అని అన్నారు.
అంత్యక్రియలు
ప్రతీక్ యాదవ్ అంత్యక్రియలు గురువారం మధ్యాహ్నం 1:30 గంటలకు లక్నోలో నిర్వహించనున్నారు. ఆయన తల్లి సాధనా యాదవ్ అంత్యక్రియలు జరిగిన ఘాట్లోనే ప్రతీక్ అంతిమ సంస్కారాలు కూడా జరగనున్నాయి. ముఖ్యమంత్రి యోగి ఆదిత్యనాథ్ సహా పలువురు ప్రముఖులు ప్రతీక్ నివాసానికి చేరుకుని నివాళులర్పించారు.