“మొదట మా అమ్మను.. తర్వాత మా అక్కను.. మా నాన్నే చంపేశాడు!” చెరువులోకి నెట్టేసినా అదృష్టవశాత్తూ ప్రాణాలతో బయటపడ్డ 8 ఏళ్ల కొడుకు.. కన్నీరుమున్నీరవుతూ ఇచ్చిన వాంగ్మూలం..!!!

మధ్యప్రదేశ్ రాష్ట్రం ఇందోర్ పరిధిలోని ఝలారియా గ్రామంలో చోటుచేసుకున్న జంట హత్యల ఘటన తీవ్ర దిగ్భ్రాంతిని కలిగించింది.

కుటుంబ కలహాల నేపథ్యంలో తల్లి, ఆమె 11 ఏళ్ల కుమార్తె ప్రాణాలు కోల్పోయారు. ఈ దారుణానికి మృతురాలి భర్త సునీల్ చౌహాన్ ఒడిగట్టినట్లు ఆరోపణలు వచ్చాయి. ఘటన సమయంలో అక్కడే ఉన్న 8 ఏళ్ల బాలుడు ప్రాణాలతో బయటపడి, పోలీసులకు ఇచ్చిన వివరాలు ఈ కేసు విచారణలో అత్యంత కీలకంగా మారాయి. దీంతో పోలీసులు కేసు నమోదు చేసి ముమ్మర దర్యాప్తు ప్రారంభించారు.

కుటుంబ తగాదాల వల్లే ఈ ఘోరం జరిగినట్లు ప్రాథమిక విచారణలో తేలింది. ఘటన జరిగిన రోజు భార్య అనిత, సునీల్ చౌహాన్‌ల మధ్య మరోసారి తీవ్ర వాగ్వాదం జరిగింది. అనంతరం భార్యను, ఇద్దరు పిల్లలను అతడు గ్రామ సమీపంలోని చెరువు వద్దకు తీసుకెళ్లాడు. అక్కడ భార్య అనిత, 11 ఏళ్ల కుమార్తె మాహిలను నీటిలోకి నెట్టి చంపేసినట్లు సమాచారం. అయితే, 8 ఏళ్ల కుమారుడు అజయ్ ఎలాగోలా ప్రాణాలతో బయటపడి, జరిగిన ఘోరం గురించి పోలీసులకు తెలిపాడు.

సమాచారం అందుకున్న వెంటనే పోలీసులు ఘటనా స్థలానికి చేరుకుని గాలింపు చర్యలు చేపట్టారు. చీకటి సమయం కావడంతో చెరువులో మృతదేహాల వెలికితీత కష్టతరంగా మారడంతో రెస్క్యూ టీమ్ సహాయం తీసుకున్నారు. సుదీర్ఘ గాలింపు అనంతరం తల్లి, కూతురి మృతదేహాలను వెలికితీశారు. వీరి మధ్య చాలా కాలంగా కుటుంబ కలహాలు ఉన్నాయని, హత్యకు గల పూర్తి కారణాలపై పలు కోణాల్లో దర్యాప్తు చేస్తున్నామని పోలీసులు వెల్లడించారు.

ఈ ఘటనపై పోలీసులు హత్య కేసు నమోదు చేసి నిందితుడిని అదుపులోకి తీసుకున్నారు. కళ్లముందే తల్లిని, అక్కను కోల్పోయిన 8 ఏళ్ల బాలుడు ఇచ్చిన సాక్ష్యం ఈ కేసులో కీలక ఆధారంగా మారింది. ఘటనా స్థలం నుంచి ఇతర సాంకేతిక ఆధారాలను సైతం సేకరిస్తున్నారు. ఈ కేసు పూర్వాపరాలను సమగ్రంగా విచారించి, నిందితుడిపై కఠిన చట్టపరమైన చర్యలు తీసుకుంటామని పోలీసులు స్పష్టం చేశారు.