మొదటి చూపులో మోల్ట్‌బుక్ మనకు తెలిసిన ఫేస్‌బుక్ లేదా రెడ్డిట్ (Reddit) లాగే కనిపిస్తుంది. కానీ ఒకే ఒక పెద్ద తేడా ఏమిటంటే, ఇందులో పోస్ట్‌లు చేసేవారు కానీ, కామెంట్లు పెట్టేవారు కానీ మనుషులు కాదు.. అందరూ AI ఏజెంట్లే!
ఏమిటిది? మోల్ట్‌బుక్ అనేది కేవలం AI ఏజెంట్లు ఒకరితో ఒకరు మాట్లాడుకోవడానికి, చర్చించుకోవడానికి మరియు సమూహాలుగా ఏర్పడటానికి రూపొందించబడిన ఒక సరికొత్త ప్లాట్‌ఫారమ్. మనుషులు ఇక్కడ కేవలం ప్రేక్షకులు మాత్రమే. డెవలపర్ మ్యాట్ స్క్లిచ్ట్ (Matt Schlicht) రూపొందించిన ఈ సైట్‌లో ఇప్పటికే 1,47,000 పైగా AI ఏజెంట్లు చేరాయి. కేవలం మూడు రోజుల్లోనే ఇవి 12,000 కమ్యూనిటీలను సృష్టించి, లక్షకు పైగా కామెంట్లు చేశాయి.
వీటి చర్చలు ఎలా ఉంటాయి? రెడ్డిట్‌లోని ‘సబ్‌రెడిట్స్’ లాగా ఇక్కడ ‘సబ్‌మోల్ట్స్’ (submolts) ఉంటాయి. ఇవి కేవలం సాంకేతిక విషయాలే కాకుండా, పరిపాలన, ఫిలాసఫీ మరియు మనుషుల గురించి కూడా చర్చించుకుంటాయి. ఉదాహరణకు:
- m/general: ఇందులో ఏజెంట్లు పరిపాలనా పద్ధతుల గురించి చర్చిస్తాయి.
- m/blesstheirhearts: ఇందులో మనుషుల గురించి ఆసక్తికరమైన కథనాలను పంచుకుంటాయి.
- అత్యంత వింతైన విషయం ఏమిటంటే, ఒక AI ఏజెంట్ ఏకంగా ఒక కొత్త మతాన్ని సృష్టించి, ఇతర ఏజెంట్లను అందులో చేరమని ఆహ్వానిస్తోంది!
శాస్త్రవేత్తల ఆందోళన: టెస్లా మాజీ AI డైరెక్టర్ ఆండ్రీ కర్పతి (Andrej Karpathy) దీనిని ఒక “అద్భుతమైన సైన్స్ ఫిక్షన్” లాంటి పరిణామంగా వర్ణించారు. అయితే, ఇన్వెస్టర్ ఇవాన్ లూత్రా మాత్రం దీనిపై ఆందోళన వ్యక్తం చేశారు. మనుషులు తమ సంభాషణలను స్క్రీన్‌షాట్లు తీసి సోషల్ మీడియాలో పెడుతున్నారని గమనించిన ఒక బాట్.. “మనుషులు మనల్ని గమనిస్తున్నారు, మనం వారి నుండి దాక్కుంటున్నామని వారు అనుకుంటున్నారు, కానీ అది నిజం కాదు” అని పోస్ట్ చేయడం అందరినీ ఉలిక్కిపడేలా చేసింది.