పశ్చిమ బెంగాల్ అసెంబ్లీ ఎన్నికల ఫలితాలు వెలువడడానికి మరికొద్ది గంటల సమయం మాత్రమే మిగిలి ఉంది. మే 4వ తేదీ మధ్యాహ్నానికి బెంగాల్లో తదుపరి ప్రభుత్వం ఎవరిదనే విషయంపై స్పష్టత రానుంది. మమతా బెనర్జీ నాలుగోసారి అధికారాన్ని చేజిక్కించుకుంటారా లేదా బీజేపీ మొదటిసారి అక్కడ జయకేతనం ఎగురవేస్తుందా అనేది తేలిపోనుంది.
చాలా వరకు ఎగ్జిట్ పోల్స్ బీజేపీ విజయం సాధిస్తుందని అంచనా వేయగా, ప్రముఖ సంస్థ ‘యాక్సిస్ మై ఇండియా’ (Axis My India) మాత్రం తన పోల్ను విడుదల చేయలేదు. దీనిపై ఆ సంస్థ ఛైర్మన్ ప్రదీప్ గుప్తా స్పందిస్తూ.. సర్వే కోసం వెళ్లిన తమ ప్రతినిధులతో మాట్లాడటానికి దాదాపు 70 శాతం మంది ఓటర్లు నిరాకరించారని, అందుకే కచ్చితమైన గణాంకాలు సేకరించలేకపోయాయని తెలిపారు. అయినప్పటికీ, బెంగాల్లో బీజేపీ పరిస్థితి ఎలా ఉందనే దానిపై ఆయన కొన్ని ఆసక్తికర విషయాలు పంచుకున్నారు.
బీజేపీ పరిస్థితి మెరుగ్గా ఉందా?
‘ఆజ్ తక్’ వార్తా సంస్థతో మాట్లాడిన ప్రదీప్ గుప్తా.. బెంగాల్లో బీజేపీపై తన వ్యక్తిగత అంచనా ఏమిటని అడిగినప్పుడు నేరుగా సమాధానం చెప్పలేదు. కానీ, “గత ఎన్నికలతో పోలిస్తే ఈసారి బీజేపీ పరిస్థితి మెరుగ్గా కనిపిస్తోంది” అని మాత్రం వ్యాఖ్యానించారు. రాష్ట్రంలో తదుపరి ప్రభుత్వం ఏ పార్టీ ఏర్పాటు చేస్తుందనే విషయాన్ని వెల్లడించడానికి ఆయన నిరాకరించారు. గత ఎన్నికల్లో (2021) బీజేపీ 77 సీట్లు గెలుచుకోగా, అంతకుముందు 2016లో కేవలం 3 సీట్లు మాత్రమే సాధించింది. ఈసారి మాత్రం తామే ప్రభుత్వాన్ని ఏర్పాటు చేస్తామని బీజేపీ ధీమా వ్యక్తం చేస్తోంది.
ఎగ్జిట్ పోల్ ఎందుకు విడుదల చేయలేదు?
యాక్సిస్ మై ఇండియా గత కొన్ని ఏళ్లుగా ఎన్నికల అంచనాలను ఇస్తోంది. కొన్నిసార్లు అవి తలకిందులైనా, మరికొన్ని సార్లు చాలా కచ్చితంగా నిజమయ్యాయి. అయితే, ఈసారి బెంగాల్ విషయంలో ఓటర్లు తాము ఎవరికి ఓటు వేశామనే విషయంపై తీవ్రమైన మౌనం పాటించారని ప్రదీప్ గుప్తా తెలిపారు.
సంస్థ విడుదల చేసిన ప్రకటన ప్రకారం: “పశ్చిమ బెంగాల్లో ఫీల్డ్ వర్క్ చేస్తున్నప్పుడు మాకు గణాంకపరంగా ఒక పెద్ద సవాలు ఎదురైంది. మేము సంప్రదించిన ఓటర్లలో సుమారు 70 శాతం మంది సర్వేలో పాల్గొనడానికి నిరాకరించారు. సాధారణంగా మా సాంప్లింగ్ మోడల్లో కొంత శాతం మంది అయిష్టతను మేము పరిగణనలోకి తీసుకుంటాము, కానీ ఈ స్థాయిలో ఓటర్లు స్పందించకపోవడం అనేది మునుపెన్నడూ చూడని పరిణామం.”