వాషింగ్టన్: ఇరాన్-అమెరికా మధ్య జరుగుతున్న యుద్ధ విరమణ చర్చలలో మధ్యవర్తిగా వ్యవహరిస్తున్న పాకిస్థాన్ నిష్పాక్షికతను అమెరికా తీవ్రంగా ప్రశ్నించింది.
అమెరికా అధ్యక్షుడు డొనాల్డ్ ట్రంప్నకు అత్యంత సన్నిహితుడైన రిపబ్లికన్ సెనేటర్ లిండ్సే గ్రాహం, పాకిస్థాన్ను అస్సలు నమ్మలేమని స్పష్టం చేశారు. శాంతి స్థాపనకు పాకిస్థానే అతిపెద్ద అడ్డంకి అని ఆయన విశ్లేషించారు. ఈ వైఖరి కారణంగా భవిష్యత్తులో పాకిస్థాన్ అంతర్జాతీయంగా మరింత ఒంటరి అయ్యే అవకాశం ఉంది.
లిండ్సే గ్రాహం తీవ్ర వ్యాఖ్యలు: ఇరాన్ సైనిక విమానాలకు పాకిస్థాన్ తన వైమానిక స్థావరాలను వాడుకోవడానికి అవకాశం కల్పిస్తోందని గ్రాహం ఆరోపించారు. పాకిస్థాన్ నాయకత్వం చేస్తున్న వ్యాఖ్యలు అశాంతిని కలిగిస్తున్నాయని, చర్చలలో ఆ దేశం నిష్పాక్షికంగా వ్యవహరిస్తుందన్న దానిపై తీవ్ర అనుమానాలు ఉన్నాయని ఆయన అన్నారు. “పాకిస్థాన్ ఒక మధ్యవర్తిగా సమస్యలను సృష్టిస్తోంది. ఇజ్రాయెల్పై వారికి ఉన్న శత్రుత్వం చాలా కాలంగా కొనసాగుతోంది. ఇరాన్ యుద్ధ విమానాలు పాక్ స్థావరాల్లో ఉన్నాయనేది కాదనలేని వాస్తవం” అని ఆయన ‘ఎక్స్’ (ట్విట్టర్) వేదికగా పేర్కొన్నారు.
అబ్రహం ఒప్పందాలపై పాక్ వ్యతిరేకత: ఇజ్రాయెల్తో దౌత్య, ఆర్థిక మరియు భద్రతా సంబంధాలను బలోపేతం చేసే లక్ష్యంతో అమెరికా తీసుకొచ్చిన ‘అబ్రహం ఒప్పందాల’లో (Abraham Accords) చేరాలని ట్రంప్ చేసిన పిలుపును పాకిస్థాన్ బహిరంగంగా తిరస్కరించింది. ఈ ఒప్పందంలో తాము ఎప్పటికీ చేరమని పాకిస్థాన్ రక్షణ మంత్రి ఖ్వాజా ఆసిఫ్ ప్రకటించడంపై గ్రాహం తీవ్ర అసహనం వ్యక్తం చేశారు. ఇజ్రాయెల్ను తాము విశ్వసించబోమని పాక్ స్పష్టం చేసింది.
ఏమిటీ అబ్రహం ఒప్పందాలు? 2020లో ట్రంప్ ప్రభుత్వం మధ్యప్రాచ్యంలో శాంతిని నెలకొల్పేందుకు అబ్రహం ఒప్పందాలను ప్రవేశపెట్టింది. దీని ప్రకారం, అరబ్ దేశాలు ఇజ్రాయెల్ను అధికారికంగా గుర్తించి, వారితో వ్యాపార మరియు దౌత్య సంబంధాలు కలిగి ఉండాలి. యూఏఈ, బహ్రెయిన్, మొరాకో మరియు సూడాన్ దేశాలు ఇప్పటికే ఈ ఒప్పందాలపై సంతకం చేశాయి. అయితే, తమ దేశ ‘మూల సిద్ధాంతాలకు’ ఇవి విరుద్ధమని చెబుతూ పాకిస్థాన్ ఇందులో చేరడానికి నిరాకరించింది.
పాలస్తీనా వైఖరి: గత 75 ఏళ్లుగా పాలస్తీనాకు మద్దతు ఇస్తున్న పాకిస్థాన్, ఇజ్రాయెల్ను ఒక దేశంగా గుర్తించేందుకు నిరంతరం నిరాకరిస్తోంది. తూర్పు జెరూసలేం రాజధానిగా స్వతంత్ర పాలస్తీనా ఏర్పడితేనే ఇజ్రాయెల్ను గుర్తిస్తామని పాకిస్థాన్ తన పాత వైఖరినే కొనసాగిస్తోంది.