కాన్పూర్లో 23 ఏళ్ల యువ న్యాయవాది కోర్టు భవనం ఐదో అంతస్తు నుండి దూకి ప్రాణాలు తీసుకున్నాడు. ప్రియాంశు శ్రీవాస్తవ అనే ఈ లాయర్, తన తండ్రి పెడుతున్న మానసిక వేధింపులు భరించలేక ఈ ఘోర నిర్ణయం తీసుకున్నట్లు అతని సుసైడ్ నోట్ మరియు వాట్సాప్ స్టేటస్ ద్వారా వెల్లడైంది.
తన సుసైడ్ నోట్లో “నా శవాన్ని కనీసం మా నాన్న తాకనివ్వకండి” అని ప్రియాంశు రాశాడంటే, అతను ఎంతటి మానసిక క్షోభను అనుభవించి ఉంటాడో అర్థం చేసుకోవచ్చు. ప్రస్తుతం పోలీసులు ఈ కేసుపై దర్యాప్తు చేస్తున్నారు.
కోర్టు భవనం ఐదో అంతస్తు నుండి దూకిన లాయర్: గురువారం మధ్యాహ్నం కాన్పూర్ కోర్టు ఆవరణలో ఈ సంచలన ఘటన చోటుచేసుకుంది. ప్రత్యక్ష సాక్షుల కథనం ప్రకారం.. మధ్యాహ్నం సుమారు 2 గంటల సమయంలో ప్రియాంశు కొత్త కోర్టు భవనం ఐదో అంతస్తుకు చేరుకుని ఒక్కసారిగా కిందకు దూకేశాడు. తలకు తీవ్ర గాయం కావడంతో అతను అక్కడికక్కడే మృతి చెందాడు. సమాచారం అందుకున్న డీసీపీ ఈస్ట్ సత్యజిత్ గుప్తా మరియు ఇతర అధికారులు ఘటనా స్థలానికి చేరుకుని విచారణ చేపట్టారు.
రెండు పేజీల సుసైడ్ నోట్: ప్రియాంశు ఆత్మహత్యకు ముందు తన వాట్సాప్ స్టేటస్లో రెండు పేజీల సుసైడ్ నోట్ను పోస్ట్ చేశాడు. అందులోని వివరాలు అత్యంత హృదయ విదారకంగా ఉన్నాయి.
‘నేను ఓడిపోయాను, నాన్న గెలిచారు.. లవ్ యూ మమ్మీ’: సుసైడ్ నోట్లో ప్రియాంశు ఇలా రాశాడు: “ఇప్పటి వరకు నా జీవితంలో జరిగిన విషయాలు చూస్తుంటే, ఇలాంటి అవమానకరమైన జీవితం బతకడం అనవసరం అనిపిస్తోంది. నాకు 6 ఏళ్ల వయసున్నప్పుడు ఫ్రిజ్లో ఉన్న మ్యాంగో జ్యూస్ తాగినందుకు.. నగ్నంగా ఇంటి నుండి బయటకు గెంటేశారు. ప్రతి నిమిషం అనుమానంగా చూడటం, ప్రతి సెకనుకు లెక్క అడగడం.. ఇదంతా మానసిక హింస కాదా?”
అతను ఇంకా ఇలా కొనసాగించాడు: “హైస్కూల్ రిజల్ట్స్ రాకముందే, మార్కులు తక్కువ వస్తే నగ్నంగా ఇంటి నుండి పంపేస్తానని మా నాన్న బెదిరించారు. రోజురోజుకూ కుమిలిపోతూ చావడం కంటే ఒక్కరోజే చనిపోవడం మేలు. పిల్లల మీద వాళ్ళు భరించగలిగే అంత హింస మాత్రమే చేయాలని నేను ప్రతి తల్లిదండ్రులను వేడుకుంటున్నాను. నా విన్నపం ఒక్కటే.. నా శవాన్ని మా నాన్న ముట్టుకోనివ్వకండి. నేను ఓడిపోయాను, నాన్న గెలిచారు. లవ్ యూ మమ్మీ..”
CCTV లో రికార్డైన దృశ్యాలు: డీసీపీ సత్యజిత్ గుప్తా తెలిపిన వివరాల ప్రకారం.. CCTV ఫుటేజీలో ప్రియాంశు ఐదో అంతస్తులో కూర్చుని ఫోన్ మాట్లాడిన తర్వాత ఒక్కసారిగా దూకేయడం రికార్డైంది.
తండ్రి కూడా న్యాయవాదే: ప్రియాంశు తండ్రి రాజేంద్ర కుమార్ శ్రీవాస్తవ కూడా న్యాయవాదే. వారు కాన్పూర్లోని బర్రా-8 ప్రాంతంలో నివసిస్తున్నారు. ప్రియాంశు తన తండ్రితో కలిసే వృత్తిని కొనసాగిస్తున్నాడు. కానీ సుసైడ్ నోట్ ప్రకారం, తండ్రి పెడుతున్న నిరంతర వేధింపులే తన ఆత్మహత్యకు కారణమని అతను స్పష్టంగా పేర్కొన్నాడు.