బెంగళూరులోని ఆడుగోడి మునికృష్ణప్ప లేఅవుట్లో జార్ఖండ్కు చెందిన 34 ఏళ్ల యువతి తన నివాసంలో నగ్న స్థితిలో, పాక్షికంగా కుళ్ళిపోయిన మృతదేహమై కనిపించిన భీకర ఘటన వెలుగుచూసింది. మృతురాలిని జార్ఖండ్లోని ధన్బాద్, హీరాపూర్ నివాసి పూజా దత్తా (34)గా గుర్తించారు. ఈమె గతంలో బెంగళూరులోని ఒక ప్రైవేట్ కంపెనీలో పనిచేసేదని, ఇటీవల ఉద్యోగం మానేసిందని సమాచారం.
దుర్వాసన రావడంతో వెలుగులోకి: పూజా దత్తా మృతదేహం నగ్నంగా, కుళ్ళిన స్థితిలో లభించడంతో ఆమె మరణించి 2-3 రోజులు అయి ఉండవచ్చని పోలీసులు అనుమానిస్తున్నారు. ఆమె సుమారు మూడు ఏళ్లుగా అదే ఇంట్లో అద్దెకు ఉంటోంది. ఏప్రిల్ 27న ఆమె నివాసం నుండి విపరీతమైన దుర్వాసన రావడంతో చుట్టుపక్కల వారు పోలీసులకు సమాచారం అందించారు.
రక్తపు మడుగులో మృతదేహం: పోలీసులు ఘటనా స్థలానికి చేరుకుని, ఇంటి తలుపులు లోపల నుండి లాక్ చేసి ఉండటంతో వాటిని పగలగొట్టి లోపలికి వెళ్లారు. అక్కడ పూజా దత్తా మృతదేహం నగ్నంగా, రక్తపు మడుగులో పడి ఉంది. గది అంతా పేపర్ ముక్కలు చిందరవందరగా పడి ఉన్నాయి. ఆమె మెడ మరియు చేతులపై గాయాలు ఉన్నట్లు పోలీసులు గుర్తించారు. ప్రాథమిక విచారణలో ఆమె కనీసం మూడు రోజుల క్రితమే మరణించి ఉండవచ్చని తేలింది.
ఇంటి యజమాని వెల్లడించిన విషయాలు: ఇంటి యజమాని జానకమ్మ తెలిపిన వివరాల ప్రకారం.. పూజా దత్తా గత మూడు ఏళ్లుగా ఇక్కడే ఉంటోంది. ఆమె ఎక్కువగా హిందీలోనే మాట్లాడేది. తరచుగా ఒక యువకుడు ఆమెను కలవడానికి వచ్చేవాడని, వారిద్దరి మధ్య తరచుగా గొడవలు జరిగేవని ఆమె తెలిపారు. గత గురువారం సరుకుల కోసం బయటకు వచ్చినప్పుడే పూజాను ఆఖరిసారిగా చూశానని జానకమ్మ పేర్కొన్నారు.
ప్రస్తుతం ఆడుగోడి పోలీసులు కేసు నమోదు చేసుకుని మృతదేహాన్ని పోస్టుమార్టం నిమిత్తం తరలించారు. ఇది హత్యనా లేక ఆత్మహత్యనా? ఆమె ఇంటికి వస్తున్న ఆ యువకుడు ఎవరు? వారి మధ్య గొడవలకు కారణం ఏంటి? అనే కోణంలో పోలీసులు దర్యాప్తు చేస్తున్నారు. పోస్టుమార్టం నివేదిక వచ్చిన తర్వాతే ఈ మరణంపై స్పష్టత రానుంది.