యూజీసీ నిబంధనల్లోని మంచిని వివరించిన వికాస్ దివ్యకీర్తి.. అగ్రవర్ణ విద్యార్థుల ఆందోళనలపై కీలక వ్యాఖ్యలు

యూజీసీ కొత్త నిబంధనలపై వివాదం కొనసాగుతున్నప్పటికీ, డాక్టర్ వికాస్ దివ్యకీర్తి వీటికి మద్దతు తెలిపారు. ఈ నిబంధనల్లో వివక్షకు తావులేదని, ఇవి 2012 నాటి నిబంధనల కంటే మెరుగ్గా ఉన్నాయని ఆయన పేర్కొన్నారు. ముఖ్యంగా, ఈ నిబంధనలకు వ్యతిరేకంగా జరుగుతున్న నిరసనలపై ఆయన పలు ప్రశ్నలు సంధించారు.

వార్తా సంస్థ ‘ANI’తో మాట్లాడిన దివ్యకీర్తి.. “కొన్ని అంశాలను మినహాయిస్తే, ఈ నిబంధనలు చాలా బాగున్నాయి. 2012 కంటే ఇవి ఎంతో మెరుగైనవి, వీటి అవసరం కూడా ఉంది” అని అన్నారు.

వివక్షపై విమర్శలకు సమాధానం: నిబంధనల్లో వివక్ష ఉందన్న ఆరోపణలపై స్పందిస్తూ.. “వివక్ష అనేది కేవలం ఒక భావన కాదు, అది చర్యలో కనిపించాలి. కేవలం మనసులో అలా అనిపించినంత మాత్రాన అది నిజం కాదు. సమాజంలోని అన్ని వర్గాలకు ప్రాతినిధ్యం ఉండేలా మరికొన్ని మార్పులు చేయవచ్చు” అని సూచించారు.

అగ్రవర్ణ (General Category) గురించి ప్రస్తావిస్తూ.. “నిబంధనలు రూపొందించే వారు జనరల్ కేటగిరీని పక్కన పెట్టాలని అనుకోరు. ప్రస్తుతం అధికారంలో ఉన్న ప్రభుత్వం తన ప్రధాన ఓటు బ్యాంక్‌ను విస్మరించి నిర్ణయం తీసుకుంటుందని ఎలా అనుకుంటాం? 2012లో కూడా ఇలాగే ఉన్నప్పటికీ అప్పుడు ఎవరూ అడగలేదు, ఇప్పుడు ఇంత రచ్చ ఎందుకు జరుగుతుందో అర్థం కావడం లేదు” అని వ్యాఖ్యానించారు.

నిరసనల వెనుక ఎవరున్నారు? ప్రస్తుతం జరుగుతున్న నిరసనలు సహజమైనవి కావని ఆయన అభిప్రాయపడ్డారు. “విశ్వవిద్యాలయాల ఉపకులపతులు (VCs), కళాశాల ప్రిన్సిపాళ్లు ఈ నిరసనలు చేయిస్తున్నారని నేను భావిస్తున్నాను. ఎక్కడైతే ఓబీసీ అని ఉందో అక్కడ చిన్న సవరణ చేస్తే సరిపోతుంది, చాలా మందికి పెద్దగా ఇబ్బంది లేదు. కానీ నిబంధనల కఠినతను తట్టుకోలేక కొందరు ఈ మొత్తం చట్టాన్ని వెనక్కి తీసుకోవాలని డిమాండ్ చేస్తున్నారు” అని ఆయన అన్నారు.

కొత్త నిబంధనలు ఏమిటి? యూజీసీ జనవరి 13, 2026న “ఉన్నత విద్యా సంస్థల్లో సమానత్వాన్ని ప్రోత్సహించే నిబంధనలు-2026″ను విడుదల చేసింది. ఇవి 2012 నాటి వివక్ష వ్యతిరేక నిబంధనల స్థానంలో వచ్చాయి. కుల వివక్షతో పాటు ఇతర రకాల వివక్షలను అరికట్టడానికి ఉన్నత విద్యా సంస్థల్లో కఠినమైన పాలనను ఇవి అమలు చేస్తాయి.