యూపీ క్రైమ్ న్యూస్: ఉత్తరప్రదేశ్లోని అలీగఢ్ జిల్లాలో కన్నతండ్రే కూతురిని దారుణంగా హత్య చేసిన ఉదంతం వెలుగులోకి వచ్చింది. ఈ కేసులో నిందితుడైన తండ్రి పోలీసుల విచారణలో షాకింగ్ నిజాలను వెల్లడించాడు. తన కూతురి ప్రేమ వ్యవహారం నచ్చకపోవడం వల్లే తీవ్ర మనస్తాపానికి గురై ఆమెను హత్య చేసినట్లు అంగీకరించాడు.
ఈ ఘోర ఘటన జిల్లాలోని ఖైర్ ప్రాంతానికి చెందిన జరారా గ్రామంలో జరిగింది. ఇక్కడ నివసించే పూరన్ అనే వ్యక్తి రెండు రోజుల క్రితం తన కుమార్తె శివానిని గొంతు నులిమి హత్య చేశాడు.
మంగళవారం సాయంత్రం యువతి తల్లి పోలీసులను ఆశ్రయించి.. తన భర్త కూతురిని హత్య చేసి, శవాన్ని హైటెన్షన్ విద్యుత్ లైన్ కింద ఉన్న రామ్కౌర్ పొలంలో పాతిపెట్టాడని ఫిర్యాదు చేసింది. సమాచారం అందుకున్న వెంటనే పోలీసులు ఘటనా స్థలానికి చేరుకుని నిందితుడైన తండ్రిని అదుపులోకి తీసుకుని విచారించారు. అనంతరం నిందితుడిని పొలానికి తీసుకెళ్లి, అక్కడ దాదాపు ఐదు అడుగుల లోతు గొయ్యిలో పాతిపెట్టిన శివాని మృతదేహాన్ని వెలికితీశారు.
ఎనిమిది రోజులుగా అన్నం మానేసిన కూతురు
తండ్రి పూరన్ పోలీసులకు తెలిపిన వివరాల ప్రకారం.. శివానికి గత ఏడాది కాలంగా పొరుగున ఉండే ఒకే సామాజిక వర్గానికి చెందిన యువకుడితో ప్రేమ వ్యవహారం నడుస్తోంది. దీనిపై ఆమెను ఎన్నోసార్లు మందలించినప్పటికీ వినలేదు. పైగా గత ఎనిమిది రోజులుగా ఆమె అన్నం తినడం కూడా మానేసింది. ఘటన జరిగిన రాత్రి ఆమె యాసిడ్ (తేజాబ్) కూడా తాగింది. దీంతో ఆ అమ్మాయి ఎక్కడ అతనితో కలిసి పారిపోతుందో లేదా ఆత్మహత్య చేసుకుంటుందో.. దానివల్ల తమ కుటుంబ పరువు బజారున పడుతుందని భయపడి, తానే స్వయంగా ఆమెను చంపేయాలని నిర్ణయించుకున్నాడు.
పూరన్ విచారణలో మాట్లాడుతూ- “నా కూతురు వేరే యువకుడితో పరిచయం పెంచుకుంది. ‘లాలీ (కూతురి పిలుపు పేరు) నా మాట విను, తప్పు చేయకు’ అని చెప్పినా వినలేదు. ఒకసారి నేను వారిద్దరినీ కలిసుండగా చూశాను. వేరే పెళ్లి చేస్తానన్నా నిరాకరించి, ఆ అబ్బాయినే చేసుకుంటానని మొండికేసింది. ఆమె ఎలాగైనా పారిపోతుందని నాకు అర్థమైంది. ఆ అవమానాన్ని నేను తట్టుకోలేకపోయాను. అందుకే చంపేశాను” అని పేర్కొన్నాడు.
ఆరోగ్యం క్షీణించినా ఆసుపత్రికి తీసుకెళ్లలేదు
యాసిడ్ తాగడం వల్ల ఆమె ఆరోగ్యం క్షీణించిందని, అయితే ఆమెను ఆసుపత్రికి తీసుకెళ్లే బదులు ఇంట్లోనే ఊపిరాడకుండా చేసి చంపేశానని నిందితుడు తెలిపాడు. శివాని చనిపోయిన తర్వాత గది బయట ఉన్న తన మోటార్ సైకిల్ (బైక్) పై శవాన్ని కూర్చోబెట్టి, పడిపోకుండా ఉండటానికి ఒక తాడుతో శవాన్ని తన శరీరానికి కట్టి గట్టిగా ముడివేశాడు.
అక్కడి నుండి అర్ధరాత్రి తన ఇంటికి అర కిలోమీటరు దూరంలో ఉన్న అటవీ ప్రాంతంలోని పొలానికి తీసుకెళ్లాడు. అక్కడ సోమవారం తెల్లవారుజామున ఒంటరిగానే ఐదు అడుగుల లోతు గొయ్యి తవ్వి శవాన్ని పాతిపెట్టాడు. ప్రస్తుతం పోలీసులు నిందితుడైన తండ్రిని అరెస్ట్ చేసి జైలుకు తరలించారు.