లండన్: హార్ముజ్ జలసంధిని మళ్ళీ తెరిచే మార్గాలపై చర్చించడానికి ఈ వారం అంతర్జాతీయ దౌత్య సదస్సును బ్రిటన్ నిర్వహించనున్నట్లు ప్రధాని కీర్ స్టార్మర్ తెలిపారు. కీలకమైన చమురు రవాణా మార్గంలో సముద్ర భద్రతను పునరుద్ధరించడానికి 35 దేశాలు కలిసి పనిచేస్తాయని ఆయన ధృవీకరించారు.
ఇరాన్ మరియు అమెరికా మధ్య యుద్ధం ప్రారంభమై నెల రోజులకు పైగా గడిచింది. అమెరికా దాడులకు ప్రతిస్పందనగా, గల్ఫ్ ప్రాంతంలోని అమెరికా సైనిక స్థావరాలపై ఇరాన్ దాడులు చేస్తోంది. దీంతో మధ్యప్రాచ్యంలో తీవ్ర ఉద్రిక్తతలు నెలకొన్నాయి.
అమెరికాకు ఎదురుదెబ్బ
మరోవైపు, హార్ముజ్ జలసంధిని ఇరాన్ తన నియంత్రణలోకి తీసుకుంది. కేవలం తమ మిత్రదేశాల నౌకలను మాత్రమే ముందస్తు అనుమతితో అనుమతిస్తామని, అమెరికా మరియు దాని మిత్రదేశాల నౌకలకు ప్రవేశం లేదని ఇరాన్ తేల్చి చెప్పింది. ఒకవేళ నిబంధనలు అతిక్రమిస్తే క్షిపణి దాడులు చేస్తామని హెచ్చరించింది.
హార్ముజ్ జలసంధి మూసివేయడంతో అంతర్జాతీయంగా చమురు సరఫరాకు ఆటంకం కలిగింది. ప్రపంచంలోని 20 శాతం చమురు వాణిజ్యం ఈ మార్గం ద్వారానే జరుగుతుంది. దీనివల్ల ముడి చమురు ధరలు ఆకాశాన్నంటాయి మరియు అనేక దేశాల్లో ఇంధన కొరత ఏర్పడింది. ఇది అమెరికాకు పెద్ద సమస్యగా మారింది.
ట్రంప్ కీలక ప్రకటన
స్వదేశంలోనే అమెరికా ప్రభుత్వానికి వ్యతిరేకంగా ప్రజలు నిరసనలు చేస్తున్నారు. ఈ క్రమంలో, ఇరాన్ వ్యవహారంలో నేడు (భారత కాలమానం ప్రకారం ఉదయం 6:30 గంటలకు) ఒక ముఖ్యమైన ప్రకటన చేయనున్నట్లు అధ్యక్షుడు డొనాల్డ్ ట్రంప్ తెలిపారు. ఇరాన్ పై దాడులను మరింత తీవ్రతరం చేస్తారా? లేదా దాడులు ఆపాలని నిర్ణయించుకున్నారా? అన్నది వేచి చూడాలి. ఇరాన్ యుద్ధంలో తమ మిత్రదేశాలు సహాయం చేయడం లేదని ట్రంప్ తీవ్ర అసహనం వ్యక్తం చేశారు. “మీకు అవసరమైన చమురును మీరే వెతుక్కోండి” అని ఆయన గతంలో ఘాటుగా వ్యాఖ్యానించారు.
35 దేశాలతో సమావేశం
ఈ నేపథ్యంలో, హార్ముజ్ జలసంధిలో నౌకల భద్రతను ఖరారు చేయడానికి 35 దేశాలతో ఒప్పందం కుదుర్చుకోనున్నట్లు బ్రిటన్ తెలిపింది. బ్రిటన్ ప్రధాని కీర్ స్టార్మర్ మాట్లాడుతూ, “మధ్యప్రాచ్య యుద్ధం బ్రిటన్ భవిష్యత్తుపై ప్రభావం చూపుతుంది. ఇది అంత తేలికైన విషయం కాదు. ఈ యుద్ధం బ్రిటన్ ది కాదు, ఇందులో మనం నేరుగా పాల్గొనము. కానీ నౌకల ప్రయాణం స్వేచ్ఛగా సాగడానికి అవసరమైన చర్యలపై 35 దేశాలతో సమావేశం నిర్వహిస్తున్నాము” అని చెప్పారు.
ఈ ఒప్పందంలో బ్రిటన్ తో పాటు ఫ్రాన్స్, జర్మనీ, ఇటలీ, జపాన్, నెదర్లాండ్స్ వంటి దేశాలు సంతకం చేయనున్నాయి. ఈ యుద్ధ ప్రభావం 1970లలో ఏర్పడిన ఇంధన సంక్షోభం లాంటి పరిస్థితులను మళ్ళీ తీసుకువచ్చే అవకాశం ఉందని బ్రిటిష్ ప్రధాని హెచ్చరించారు.