లక్నో: పబ్జీ గేమ్‌కు బానిసైన ఒక యువకుడు రాత్రంతా నిద్రపోకుండా ఆ గేమ్ ఆడాడు. ఈ క్రమంలో అతనికి అనూహ్యంగా రక్తపోటు (BP) పెరిగి, మెదడులోని రక్త నాళం పగిలిపోయింది. తక్షణమే ఆసుపత్రికి తరలించి చికిత్స అందించినప్పటికీ, ఫలితం లేకపోవడంతో ఆ యువకుడు ప్రాణాలు కోల్పోయాడు.
ఘటన వివరాలు: ఉత్తరప్రదేశ్‌లోని మీరట్ ప్రాంతానికి చెందిన మహమ్మద్ కైఫ్ అనే యువకుడికి ఆన్‌లైన్ గేమ్‌లు ఆడటం అలవాటు. ముఖ్యంగా రాత్రుళ్లు హెడ్‌ఫోన్లు పెట్టుకుని తెల్లవార్లూ పబ్జీ ఆడటాన్ని అలవాటుగా మార్చుకున్నాడు. ఇంట్లో వారు హెచ్చరించినప్పటికీ అతను వినేవాడు కాదు. గత కొన్ని రోజుల క్రితం, అర్థరాత్రి గేమ్ ఆడుతుండగా అతనికి తీవ్రమైన తలనొప్పి వచ్చింది. ఆ వెంటనే కైఫ్ అక్కడికక్కడే స్పృహతప్పి పడిపోయాడు.
వైద్యుల ప్రయత్నం: కుటుంబ సభ్యులు అతడిని వెంటనే మీరట్‌లోని ప్రైవేట్ ఆసుపత్రికి, ఆపై మెరుగైన చికిత్స కోసం ఢిల్లీకి తరలించారు. అక్కడ పరీక్షించిన వైద్యులు కైఫ్ రక్తపోటు 300 దాటిందని (సాధారణంగా 120/80 ఉండాలి) గుర్తించారు. అంతటి అధిక రక్తపోటు వల్ల మెదడులోని నరం పగిలి రక్తస్రావం (Brain Hemorrhage) జరగడంతో అతను మరణించినట్లు వైద్యులు ధృవీకరించారు.
కైఫ్ తండ్రి ఫరూక్ మాట్లాడుతూ.. తన కుమారుడు గత పదేళ్లుగా హైబీపీ సమస్యతో బాధపడుతున్నాడని, దానికి చికిత్స తీసుకుంటున్నాడని తెలిపారు. కానీ గేమ్ ఆడుతున్నప్పుడు కలిగిన ఉద్వేగం లేదా ఒత్తిడి కారణంగా బీపీ ఒక్కసారిగా పెరిగి ఈ ఘోరం జరిగిందని ఆవేదన వ్యక్తం చేశారు.