ఆంధ్రప్రదేశ్ రాష్ట్రంలోని అనంతపురం రైల్వే స్టేషన్‌లో కదులుతున్న రైలు ఎక్కేందుకు ప్రయత్నించిన ఓ ప్రయాణికుడు కాలుజారి కిందపడి, ప్లాట్‌ఫారమ్‌కు–రైలు పట్టాలకు మధ్య ఇరుక్కుపోయే ప్రమాదం తృటిలో తప్పింది.
రైలు కదులుతున్న సమయంలో దాన్ని అందుకోవాలనే ఆత్రుతతో ప్రయాణికుడు రవికుమార్ పరుగెత్తి రైలు ఎక్కేందుకు యత్నించాడు. ఆ సమయంలో బోగీ హ్యాండిల్ పట్టుకోవడానికి ప్రయత్నించగా కాలుజారి ఒక్కసారిగా కిందపడిపోయాడు. ఇది చూసి అక్కడున్న ప్రయాణికులు ఒక్కసారిగా భయాందోళనకు గురయ్యారు. ఏమాత్రం ఆలస్యమైనా పెను ప్రమాదం జరిగి ఉండేది.
అదే సమయంలో అక్కడ విధుల్లో ఉన్న కానిస్టేబుల్ సురేందర్ ప్రయాణికుడు కిందపడటాన్ని గమనించారు. వెంటనే మెరుపు వేగంతో పరుగెత్తుకుంటూ వెళ్లి, రవికుమార్ చొక్కాను గట్టిగా పట్టుకుని లాగారు. అనంతరం అతడిని ప్లాట్‌ఫారమ్‌పైకి సురక్షితంగా లాగి ప్రాణాపాయం నుంచి రక్షించారు. సదరు కానిస్టేబుల్ సమయస్ఫూర్తితో స్పందించడంతో రవికుమార్ ప్రాణాలతో బయటపడ్డాడు. రైలు కదులుతున్న వేళ క్షణాల వ్యవధిలో జరిగిన ఈ రెస్క్యూ తీవ్ర ఉత్కంఠ రేపింది.
ఈ ఘటన మొత్తం రైల్వే స్టేషన్‌లోని సీసీటీవీ కెమెరాల్లో రికార్డైంది. ఆ దృశ్యాలు ప్రస్తుతం సోషల్ మీడియాలో విపరీతంగా వైరల్ అవుతున్నాయి. ప్రాణాలకు తెగించి ప్రయాణికుడిని కాపాడిన కానిస్టేబుల్ సురేందర్ ధైర్యసాహసాలను, సమయస్ఫూర్తిని నెటిజన్లు ప్రశంసిస్తున్నారు. కదులుతున్న రైలును అందుకోవడానికి ప్రయత్నించడం ఎంతటి ప్రమాదకరమో ఈ ఘటన మరోసారి స్పష్టం చేసింది.
కదులుతున్న రైలు ఎక్కడం లేదా దిగడం అత్యంత ప్రమాదకరం కాబట్టి ప్రయాణికులు తొందరపడి ఇలాంటి సాహసాలు చేయవద్దని అధికారులు సూచిస్తున్నారు. ఒకవేళ రైలు మిస్సయినా, తర్వాతి రైలులో ప్రయాణించడమే క్షేమమనేది ఈ ఘటన ఇచ్చే ప్రధాన గుణపాఠం. క్షణాల వ్యవధిలో ప్రాణాపాయం ఎదురైనా, కానిస్టేబుల్ వేగంగా స్పందించి కాపాడిన ఈ వీడియో ప్రస్తుతం ఇంటర్నెట్‌లో తెగ చక్కర్లు కొడుతోంది.