హైదరాబాద్: వ్యాయామం చేస్తున్నాం కదా.. మాకు గుండెపోటు రాదులే అని ధీమాగా ఉన్నారా? అయితే మీరు ప్రమాదంలో ఉన్నట్లే! హైదరాబాద్కు చెందిన ప్రముఖ కార్డియాలజిస్ట్ డాక్టర్ సయ్యద్ అక్రమ్ అలీ ఇటీవల సోషల్ మీడియాలో పంచుకున్న ఒక కేసు స్టడీ ఇప్పుడు అందరినీ కలవరపెడుతోంది. 37 ఏళ్ల ఓ యువకుడు, ఎంతో క్రమశిక్షణతో కూడిన జీవనశైలిని గడుపుతున్నా.. అనూహ్యంగా గుండెపోటు బారిన పడి కేథ్ ల్యాబ్లో చేరాల్సి వచ్చింది.
కేసు వివరాలు ఇవే: సదరు వ్యక్తి రోజూ ఉదయం 5 కిలోమీటర్లు రన్నింగ్ చేస్తాడు. జంక్ ఫుడ్ జోలికి వెళ్లడు. ధూమపానం, మద్యపానం వంటి అలవాట్లు అస్సలు లేవు. సరైన సమయానికి నిద్రపోతాడు. డాక్టర్ల భాషలో చెప్పాలంటే అతను ఒక ‘పర్ఫెక్ట్ హెల్తీ మ్యాన్’. కానీ, గత నెలలో ఛాతీలో ఒత్తిడి, ఎడమ చేయి మొద్దుబారడం వంటి లక్షణాలతో ఆసుపత్రిలో చేరగా.. యాంజియోగ్రఫీలో రెండు ప్రధాన రక్తనాళాల్లో బ్లాక్స్ ఉన్నట్లు తేలింది. దీంతో అతనికి రెండు స్టెంట్లు వేయాల్సి వచ్చింది.
ఫిట్గా ఉన్నా గుండె ఎందుకు దెబ్బతింటోంది? వ్యాయామం చేయడం వల్ల శరీరం ఫిట్గా ఉంటుంది కానీ, అది రక్తనాళాల్లో పూడికలు (Blocks) ఉండవని గ్యారెంటీ ఇవ్వదని డాక్టర్ అలీ హెచ్చరిస్తున్నారు. దీనికి ప్రధాన కారణాలు ఇవే:
- జన్యుపరమైన ముప్పు (Genetics): మీ నాన్నకు లేదా బాబాయికి చిన్న వయసులోనే గుండె సమస్యలు ఉంటే.. మీరు ఎంత ఫిట్గా ఉన్నా మీకు గుండెపోటు వచ్చే అవకాశం 2 నుంచి 3 రెట్లు ఎక్కువగా ఉంటుంది.
- లైపోప్రోటీన్(ఎ) – నిశ్శబ్ద హంతకి: ఇది అత్యంత ప్రమాదకరమైన కొలెస్ట్రాల్. సాధారణ లిపిడ్ ప్రొఫైల్ పరీక్షల్లో ఇది బయటపడదు. ఇది పూర్తిగా జన్యువుల మీద ఆధారపడి ఉంటుంది. ఎల్డీఎల్ (LDL) నార్మల్గా ఉన్నా, ఇది రక్తనాళాలను మూసేస్తుంది.
- కార్పొరేట్ ఒత్తిడి (Stress): 5 కిలోమీటర్ల రన్నింగ్ ఒత్తిడిని తగ్గించలేదు. మితిమీరిన ఒత్తిడి వల్ల అడ్రినలిన్ పెరిగి, రక్తపోటు హెచ్చుతగ్గులకు లోనవుతుంది. ఇది రక్తనాళాల్లో సూక్ష్మ పలకల (Microplaques) ఏర్పాటుకు దారితీస్తుంది.
- నిద్రలేమి & స్క్రీన్ టైమ్: అర్ధరాత్రి వరకు మొబైల్ చూస్తూ కేవలం 6 గంటలు మాత్రమే నిద్రపోవడం వల్ల రక్తంలో కార్టిసాల్ స్థాయిలు పెరిగి, రక్తం చిక్కబడుతుంది. ఇది గుండెకు పెను ముప్పు.
ప్రతి భారతీయుడు (25 ఏళ్లు పైబడిన వారు) చేయించుకోవాల్సిన పరీక్షలు: సాధారణ హెల్త్ చెకప్ సరిపోదని, గుండె ఆరోగ్యంపై ఖచ్చితమైన అవగాహన కోసం ఈ క్రింది పరీక్షలు చేయించుకోవాలని డాక్టర్ అలీ సూచిస్తున్నారు:
- లైపోప్రోటీన్(ఎ) – Lipoprotein(a)
- HS-CRP: శరీరంలో వాపు (Inflammation)ను గుర్తించే పరీక్ష.
- ApoB & HbA1c: చక్కెర స్థాయిలు మరియు ప్రోటీన్ల విశ్లేషణ.
- హోమోసిస్టీన్ & విటమిన్ డి స్థాయిలు.
- కరోనరీ క్యాల్షియం స్కోర్ (35 ఏళ్లు దాటిన వారికి).
ముగింపు: “శారీరక ధృడత్వం అంటే రక్తనాళాల ఆరోగ్యం కాదు” అని ముంబై వోకార్డ్ ఆసుపత్రి నిపుణులు డాక్టర్ పారిన్ సంగోయ్ మరియు డాక్టర్ రాహుల్ గుప్తా కూడా స్పష్టం చేస్తున్నారు. కేవలం వ్యాయామంపైనే ఆధారపడకుండా.. వంశపారంపర్య హిస్టరీని గమనిస్తూ, ఎప్పటికప్పుడు అధునాతన వైద్య పరీక్షలు చేయించుకోవడమే గుండెను కాపాడుకునే ఏకైక మార్గం.