మంచి మనసున్న మనుషులు ఉన్నంతకాలం ఈ ప్రపంచం నిజంగానే అందంగా ఉంటుంది. తాజాగా ఓ బస్సు డ్రైవర్ చేసిన మానవతా చర్యకు సంబంధించిన వీడియో సోషల్ మీడియాలో వైరల్ అవుతూ.. ఆయనపై ప్రశంసలు కురిపిస్తోంది.
రోజూ అదే బస్సులో ఉద్యోగానికి వెళ్లే ఓ అంధ బాలుడు.. సాధారణంగా బస్సు ఎక్కే స్టాప్‌కు ఆ రోజు రాలేదు. ఈ విషయాన్ని గమనించిన డ్రైవర్.. బాలుడు కనిపించకపోవడంతో వెంటనే బస్సును ఆపి అతని కోసం వెతకడానికి వెళ్లాడు.
బాలుడు సాధారణంగా నడిచి వచ్చే మార్గంలో డ్రైవర్ వెతుకుతూ వెళ్లాడు. అక్కడ రోడ్డుపై చెత్త, పనికిరాని వస్తువులు అడ్డంగా పడి ఉండటంతో.. వాటిని దాటుకుని ముందుకు వెళ్లలేక బాలుడు ఇబ్బంది పడుతూ అక్కడే నిల్చున్నట్లు డ్రైవర్ గుర్తించాడు.
వెంటనే బాలుడికి సహాయం చేసిన డ్రైవర్.. అతడిని జాగ్రత్తగా తీసుకుని తిరిగి బస్సు వద్దకు వచ్చాడు. అనంతరం బాలుడిని సురక్షితంగా బస్సులో ఎక్కించాడు.
బాలుడిని వెంట తీసుకుని డ్రైవర్ తిరిగి రావడాన్ని చూసిన బస్సులోని ప్రయాణికులు.. ఆయన చేసిన పనికి ముగ్ధులయ్యారు. చాలామంది తమ సీట్ల నుంచి లేచి నిలబడి డ్రైవర్‌ను అభినందించారు.
సాధారణంగా అయితే బాలుడు కనిపించకపోయినా పట్టించుకోకుండా వెళ్లిపోయే అవకాశం ఉంది. కానీ ఈ డ్రైవర్ మాత్రం బాలుడి గురించి ఆలోచించి, తన బాధ్యతకు మించి మానవత్వంతో స్పందించాడు.
ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. “ఇలాంటి మంచి మనసున్న మనుషులు మరింత మంది ఉండాలి” అంటూ నెటిజన్లు డ్రైవర్‌ను ప్రశంసిస్తున్నారు.
Leave a Reply