లక్నో: ఉత్తరప్రదేశ్ రాజధాని లక్నోలో బుధవారం చోటుచేసుకున్న ఘోర అగ్నిప్రమాదం వర్ణనాతీతమైన విషాదాన్ని మిగిల్చింది. రింగ్ రోడ్ సమీపంలోని మురికివాడలో చెలరేగిన మంటలు ఇద్దరు కన్నబిడ్డలను బలితీసుకున్నాయి. కంటికి రెప్పలా కాపాడుకోవాల్సిన పసిప్రాణాలు కటిక మంటల్లో కాలి బూడిదయ్యాయి.
తల్లీదండ్రులు బయట.. తలుపుల వెనుక మృత్యుఘోష
బారాబంకి జిల్లాకు చెందిన సతీష్, పూనమ్ దంపతులు గత 20 ఏళ్లుగా ఈ మురికివాడలో నివసిస్తున్నారు. బుధవారం సాయంత్రం సతీష్ పనికి వెళ్లగా, పూనమ్ సామాన్లు తేవడానికి బయటకు వెళ్లింది. ఆ సమయంలో ఇంట్లోని మంచం (తఖ్త్)పై రెండేళ్ల స్వాతి, రెండు నెలల పసికందు ఆయుషి నిద్రిస్తున్నారు. ఒక్కసారిగా చెలరేగిన మంటలు గుడిసెను చుట్టుముట్టాయి. కన్నతల్లి పరుగున వచ్చేసరికి అగ్నికీలలు ఆకాశాన్ని తాకుతున్నాయి. లోపలికి వెళ్లేందుకు ఆమె ప్రయత్నించినా.. మంటల తీవ్రత చూసి స్థానికులు అడ్డుకోవడంతో కళ్ల ముందే పిల్లలు సజీవ దహనమయ్యారు.
తెల్లవారుజామున వెలుగుచూసిన భీభత్సం
బుధవారం రాత్రి 12 గంటలకు మంటలు అదుపులోకి వచ్చిన తర్వాత.. ఎస్డిఆర్ఎఫ్ (SDRF), పోలీసులు డ్రాగన్ లైట్ల సాయంతో గాలింపు చేపట్టారు. తెల్లవారుజామున 4 గంటల సమయంలో ఆ శిథిలాల మధ్య కనిపించిన దృశ్యం చూసి రెస్క్యూ టీమ్ సభ్యులు సైతం కన్నీరు పెట్టారు. నిద్రపోతున్న మంచానికే ఆ ఇద్దరు చిన్నారుల శరీర భాగాలు (మాంసపు ముద్దలు) అతుక్కుపోయి కనిపించాయి. ఆ మాంసపు ముద్దలే తమ బిడ్డలని గుర్తించిన తల్లిదండ్రుల రోదనలు మిన్నంటాయి.
ప్రభుత్వ సాయం: రూ. 4 లక్షల చెక్కు పంపిణీ
ముఖ్యమంత్రి యోగి ఆదిత్యనాథ్ ఈ ఘటనపై తీవ్ర దిగ్భ్రాంతి వ్యక్తం చేశారు. బాధితులను యుద్ధ ప్రాతిపదికన ఆదుకోవాలని అధికారులను ఆదేశించారు. ఈ మేరకు గురువారం మృతి చెందిన చిన్నారుల కుటుంబానికి ప్రభుత్వం తరపున ఒక్కొక్కరికి రూ. 4 లక్షల చొప్పున మొత్తం రూ. 8 లక్షల ఆర్థిక సాయాన్ని ప్రకటించారు. స్థానిక ఎమ్మెల్యే ఓం ప్రకాష్ శ్రీవాస్తవ బాధితులను పరామర్శించి చెక్కును అందజేశారు.
400 మంది సిబ్బందితో భారీ ఆపరేషన్
మంటలార్పేందుకు మరియు ప్రాణనష్టాన్ని తగ్గించేందుకు ఫైర్ సర్వీస్, పోలీసులు, మున్సిపల్ సిబ్బందితో కలిపి సుమారు 400 మందికి పైగా రంగంలోకి దిగారు. చుట్టుపక్కల ఉన్న 30కి పైగా ఇళ్లను ఖాళీ చేయించడం వల్ల పెను ప్రమాదం తప్పింది. ప్రస్తుతం బాధితులందరికీ సమీపంలోని కమ్యూనిటీ సెంటర్లో భోజనం, వైద్య సదుపాయాలు కల్పిస్తున్నారు.