లాండింగ్ సమయంలో లో-ఫ్లైయింగ్ విమానం సృష్టించిన బీభత్సం.. 100 ఇళ్ల పైకప్పులు ధ్వంసం, భయంతో పరుగులు తీసిన జనం!

కొచ్చి: కేరళలోని కొచ్చి అంతర్జాతీయ విమానాశ్రయంలో ల్యాండింగ్ కోసం అత్యంత అల్ప ఎత్తులో (లో-ఫ్లైయింగ్) ప్రయాణించిన ఒక విమానం తీవ్ర కలకలం రేపింది. ఆ విమానం సృష్టించిన శబ్ద తరంగాలు, బలమైన గాలి ఒత్తిడి కారణంగా సమీప గ్రామంలోని దాదాపు 100 ఇళ్ల పైకప్పులు (పెంకులు/రేకులు) ఊడి కిందపడిపోయాయి. ఈ ఊహించని ప్రమాదంతో ఇళ్లల్లో ఉన్న ప్రజలు భయంతో కేకలు వేస్తూ రోడ్లపైకి పరుగులు తీశారు.

కొచ్చి విమానాశ్రయానికి దాదాపు 4.5 కిలోమీటర్ల దూరంలో ‘శాంతినగర్’ అనే ప్రాంతం ఉంది. ఇక్కడి ఇళ్లన్నీ చాలావరకు పాతకాలపు పెంకుటిళ్లే. ఈ ప్రాంతంలో సైమన్ అనే వ్యక్తి కూడా నివసిస్తున్నాడు. ఎప్పటిలాగే ఉదయం 8 గంటల సమయంలో స్థానిక ప్రజలంతా తమ ఇళ్లల్లో పనుల్లో నిమగ్నమై ఉన్నారు. అదే సమయంలో గల్ఫ్ దేశానికి వెళ్లాల్సిన ఒక భారీ విమానం కొచ్చి విమానాశ్రయంలో ల్యాండింగ్ కావడానికి సిద్ధమైంది.

అయితే, ఆ విమానం రన్‌వే వైపు వస్తూ చాలా కిందకు ప్రయాణించింది. ఒక్కసారిగా భారీ శబ్దంతో పాటు తీవ్రమైన సుడిగాలి వీచింది. దీనివల్ల ఏర్పడిన ప్రకంపనల ధాటికి సుమారు 100 ఇళ్ల పైకప్పులు ఊడిపోయి ఇళ్ల లోపల, బయట పడిపోయాయి. ఈ క్రమంలో సైమన్ అనే వ్యక్తికి గాయాలయ్యాయి. విమానం తెచ్చిన భారీ శబ్దానికి భయపడి అతను ఇల్లు వదిలి బయటకు పరిగెత్తే ప్రయత్నం చేయగా, పైకప్పు పెంకు ఊడి అతని భుజంపై పడింది.

ఆందోళనలో స్థానికులు: ఏడాదిలో ఇది మూడోసారి!
ఈ ఘటనపై స్థానిక ప్రజలు తీవ్ర ఆగ్రహం వ్యక్తం చేస్తున్నారు. “విమానం చాలా తక్కువ ఎత్తులో ప్రయాణించడం వల్లే ఈ బలమైన గాలులు, ప్రకంపనలు వచ్చాయి. ఇళ్లు దెబ్బతినడానికి ఇదే ముఖ్య కారణం. ఈ ప్రాంతంలో ఇలా జరగడం ఇదే మొదటిసారి కాదు, గతంలోనూ జరిగాయి. విమానాశ్రయానికి సమీపంలో ఉన్న పెంకుటిళ్లు ఇలా విమానాల ప్రభావంతో దెబ్బతినడం గత ఏడాది కాలంలో ఇది మూడోసారి. పెద్ద జంబో జెట్ విమానాలు నడిపినప్పుడు ఇళ్ల కిటికీలు, తలుపులు గట్టిగా ఊగుతాయి, పైకప్పు రేకులు ఊడిపోతాయి” అని వారు ఆవేదన వ్యక్తం చేశారు.

ఈ ఘటనపై ఆలూవా నియోజకవర్గ ఎమ్మెల్యే అన్వర్ సాదత్ స్పందిస్తూ.. “బాధిత గృహయజమానులకు విమానాశ్రయ యాజమాన్యం తక్షణమే నష్టపరిహారం అందించాలి. భవిష్యత్తులో ఇలాంటి ప్రమాదకర సంఘటనలు పునరావృతం కాకుండా అధికారులు తగిన చర్యలు తీసుకోవాలి” అని డిమాండ్ చేశారు.

రంగంలోకి దిగిన అధికారులు.. దర్యాప్తు ప్రారంభం:
ప్రాథమిక విచారణలో భాగంగా విమానాశ్రయ అధికారులు సంఘటనా స్థలానికి చేరుకుని పరిశీలించారు. సైమన్ ఇల్లు దెబ్బతినడానికి తక్కువ ఎత్తులో ఎగిరిన విమానమే కారణమని అధికారులు ప్రాథమికంగా ధృవీకరించారు. కొచ్చి అంతర్జాతీయ విమానాశ్రయానికి (CIAL) సమీపంలో ఇలాంటి ఘటనలు పదే పదే జరుగుతుండటంతో, విమానాశ్రయానికి సంబంధించిన సీఎస్‌ఆర్ (CSR – కార్పొరేట్ సామాజిక బాధ్యత) నిధుల నుండి బాధితులకు నష్టపరిహారం చెల్లించే మార్గాలను అధికారులు పరిశీలిస్తున్నారు.

మరోవైపు, ఈ తీవ్రమైన అంశంపై డైరెక్టరేట్ జనరల్ ఆఫ్ సివిల్ ఏవియేషన్ (DGCA) సమగ్ర నివేదికను కోరింది. దీనిపై డిజిసిఎ ఎయిర్ సేఫ్టీ విభాగానికి చెందిన ఓ ఉన్నతాధికారి మాట్లాడుతూ.. “కొచ్చిలో జరిగిన ఘటనకు సంబంధించిన సమాచారాన్ని నిశితంగా పరిశీలిస్తున్నాం. స్థానిక కొచ్చి డిజిసిఎ అధికారులను తక్షణమే దీనిపై పూర్తి నివేదిక సమర్పించాల్సిందిగా ఆదేశించాం” అని తెలిపారు.