ఐపీఎల్ 2026లో భాగంగా ఢిల్లీ క్యాపిటల్స్ మరియు పంజాబ్ కింగ్స్ మధ్య జరిగిన 35వ మ్యాచ్లో ఒక భయంకరమైన ప్రమాదం జరిగింది. ఇది చూసిన వారందరి గుండె ఒక్క క్షణం ఆగినంత పనైంది. క్యాచ్ అందుకునే ప్రయత్నంలో ఢిల్లీ ఫాస్ట్ బౌలర్ లుంగీ ఎన్గిడి తీవ్రంగా గాయపడటంతో మైదానంలో కలకలం రేగింది. దీనికి సంబంధించిన వీడియో సోషల్ మీడియాలో వైరల్ అవుతోంది.
అసలేం జరిగింది? ఢిల్లీలోని అరుణ్ జైట్లీ స్టేడియంలో పంజాబ్ కింగ్స్ ఇన్నింగ్స్ 3వ ఓవర్లో ఈ దిగ్భ్రాంతికర ఘటన జరిగింది. ప్రియాంశ్ ఆర్య కొట్టిన షాట్ గాలిలోకి లేవగా, మిడ్-ఆఫ్ వద్ద ఉన్న లుంగీ ఎన్గిడి క్యాచ్ కోసం వెనక్కి పరిగెత్తాడు. అయితే బంతి వేగాన్ని సరిగ్గా అంచనా వేయలేక పోవడంతో ఎన్గిడి ఒక్కసారిగా కింద పడిపోయాడు. దురదృష్టవశాత్తు పడిపోయే సమయంలో అతని తల వెనుక భాగం నేలకు బలంగా తగిలింది.
మైదానంలో 10 నిమిషాల పాటు నిశ్శబ్దం: తలకు బలంగా దెబ్బ తగలడంతో ఎన్గిడి కాసేపు స్పృహ లేకుండా అక్కడే పడిపోయాడు. దాదాపు ఒక నిమిషం పాటు అతనిలో ఎలాంటి కదలిక లేకపోవడంతో స్టేడియంలోని ప్రేక్షకులు, ఆటగాళ్లు తీవ్ర ఆందోళనకు గురయ్యారు. వెంటనే వైద్య బృందం మైదానంలోకి చేరుకుంది. ఎన్గిడి మెడకు ‘నెక్ బ్రేస్’ అమర్చి జాగ్రత్తగా భద్రపరిచారు. పరిస్థితి తీవ్రతను బట్టి మైదానంలోకి అంబులెన్స్ను రప్పించాల్సి వచ్చింది. ఢిల్లీ ప్రధాన కోచ్ రికీ పాంటింగ్ కూడా మైదానంలోకి వచ్చి ఎన్గిడి ఆరోగ్యం గురించి వాకబు చేశారు. దాదాపు 10 నిమిషాల తర్వాత ఎన్గిడిని తదుపరి చికిత్స కోసం ఆసుపత్రికి తరలించారు.
ఢిల్లీకి కన్కషన్ సబ్స్టిట్యూట్: ఐపీఎల్ నిబంధనల ప్రకారం, తలకు తీవ్ర గాయం కావడంతో ఢిల్లీ క్యాపిటల్స్ ‘కన్కషన్ సబ్స్టిట్యూట్’ను కోరింది. దీనికి అనుమతి లభించడంతో ఎన్గిడి స్థానంలో యువ లెగ్ స్పిన్నర్ విప్రజ్ నిగమ్ జట్టులోకి వచ్చాడు. విప్రజ్ ఇప్పుడు ఈ మ్యాచ్లో ఎన్గిడి వేయాల్సిన మిగిలిన ఓవర్లను వేయగలడు. ఎన్గిడి పరిస్థితి ప్రస్తుతం స్థిరంగా ఉన్నప్పటికీ, అతను త్వరగా కోలుకోవాలని అభిమానులు ప్రార్థిస్తున్నారు.