మధ్యప్రాచ్యంలో యుద్ధజ్వాలలు మరింత భీభత్సాన్ని సృష్టిస్తున్నాయి. ఒకవైపు అమెరికా-ఇరాన్ మధ్య శాంతి చర్చల ప్రయత్నాలు జరుగుతుండగానే, మరోవైపు ఇజ్రాయెల్ సైన్యం దక్షిణ లెబనాన్‌లోని పల్లెలను క్రమపద్ధతిలో నామరూపాలు లేకుండా చేస్తోంది. సరిహద్దు గ్రామాల్లోని ఇళ్లకు ఇళ్లే పేలుడు పదార్థాలతో నింపి, రిమోట్ కంట్రోల్ ద్వారా వాటిని పేల్చివేస్తూ పల్లెలను స్మశానవాటికలుగా మారుస్తోంది.
కళ్లముందే కుప్పకూలుతున్న గ్రామాలు!
‘ది గార్డియన్’ నివేదిక ప్రకారం.. ఇజ్రాయెల్ సైన్యం స్వయంగా విడుదల చేసిన వీడియోలు ఈ దారుణాన్ని కళ్లకు కడుతున్నాయి. తైబే, నఖౌరా, దేర్ సెర్యాన్ వంటి సరిహద్దు గ్రామాల్లోని నివాస గృహాలను బాంబులతో పేల్చివేస్తూ నేలమట్టం చేస్తున్నారు. గతేడాది గాజాలోని రఫా, బైట్ హనూన్ ప్రాంతాల్లో 90 శాతం ఇళ్లను ఎలాగైతే ధ్వంసం చేశారో, ఇప్పుడు లెబనాన్‌లోనూ అదే ‘రఫా మోడల్’ను అమలు చేయాలని ఇజ్రాయెల్ రక్షణ మంత్రి ఇజ్రాయెల్ కాట్జ్ పిలుపునిచ్చారు.
మేధావులు ఈ వినాశనాన్ని ‘డోమిసైడ్’ (Domicide) గా అభివర్ణిస్తున్నారు. అంటే, ఒక ప్రాంతాన్ని మానవ నివాసానికి పనికిరాకుండా చేసేందుకు ఉద్దేశపూర్వకంగా ఇళ్లను, మౌలిక సదుపాయాలను సమూలంగా తుడిచిపెట్టడం.
మృతుల సంఖ్య 2,000 దాటింది!
హెజ్బొల్లా లక్ష్యంగా ఇజ్రాయెల్ సాగిస్తున్న ఈ దాడుల్లో శనివారం ఒక్కరోజే 18 మంది ప్రాణాలు కోల్పోయారు. దీంతో ఈ యుద్ధం మొదలైనప్పటి నుండి లెబనాన్‌లో మరణించిన వారి సంఖ్య 2,000 మార్కును దాటిపోయింది.
- హెజ్బొల్లా తన ఆయుధాలను, టన్నెల్స్‌ను ఇళ్లల్లోనే ఏర్పాటు చేస్తోందని, అందుకే వాటిని కూల్చివేస్తున్నామని ఇజ్రాయెల్ సమర్థించుకుంటోంది.
- దక్షిణ లెబనాన్‌లోని లితానీ నది వరకు ఉన్న ప్రాంతాన్ని ‘సెక్యూరిటీ జోన్’గా ప్రకటించి, అక్కడి ప్రజలు తిరిగి రాకుండా ఆంక్షలు విధిస్తోంది.
తేలని అమెరికా-ఇరాన్ చర్చలు!
మరోవైపు, పాకిస్థాన్‌లో జరిగిన అమెరికా-ఇరాన్ చర్చలు ఎటువంటి ఫలితాన్ని ఇవ్వకుండానే ముగిశాయి. 1979 విప్లవం తర్వాత ఇరు దేశాల మధ్య జరిగిన అత్యున్నత స్థాయి సమావేశం ఇదే కావడం విశేషం. అమెరికా ఉపాధ్యక్షుడు జెడి వాన్స్ (JD Vance) మాట్లాడుతూ.. “ఇదే మా చివరి మరియు అత్యుత్తమ ప్రతిపాదన” అని హెచ్చరించగా, ఇరాన్ ప్రతినిధి ఘాలిబాఫ్ మాత్రం అమెరికా తమ నమ్మకాన్ని పొందలేకపోయిందని స్పష్టం చేశారు.
శాంతి చర్చలు ఒకవైపు.. బాంబుల మోత మరోవైపు మధ్యప్రాచ్యాన్ని అస్థిరతలోకి నెట్టివేస్తున్నాయి. నిరాశ్రయులైన వేలాది మంది లెబనాన్ ప్రజలు తమ సొంత ఇళ్లను శిథిలాల రూపంలో చూస్తూ కన్నీరుమున్నీరవుతున్నారు.