“వయనాడ్‌లో మళ్లీ పెనుప్రమాదం”.. భారీ వర్షాలకు విరుచుకుపడిన కొండచరియలు.. మట్టిలో చిక్కుకున్న కార్మికులు..!!

కేరళ: కేరళలోని వయనాడ్ జిల్లా మేపాడి ప్రాంతంలో కురుస్తున్న భారీ వర్షాల కారణంగా ఘోర కొండచరియలు విరిగిపడ్డాయి.

మేపాడి ప్రాంతంలో సుమారు 22.6 సెంటీమీటర్ల మేర అత్యంత భారీ వర్షపాతం నమోదు కావడంతో, ఒక టన్నెల్ (సురంగ మార్గం) నిర్మాణ పనులు జరుగుతున్న ప్రదేశంలో అకస్మాత్తుగా కొండచరియలు విరిగిపడ్డాయి. ఈ ఘటనతో ఆ ప్రాంతం మొత్తం మట్టి దిబ్బల కింద కూరుకుపోయింది. దీనివల్ల రవాణా వ్యవస్థ స్తంభించి, స్థానికుల సాధారణ జీవనం పూర్తిగా దెబ్బతింది.

సమాచారం అందుకున్న వెంటనే రెస్క్యూ టీమ్స్ అక్కడికి చేరుకుని యుద్ధప్రాతిపదికన సహాయక చర్యలు చేపడుతున్నాయి. ఇప్పటివరకు మట్టిలో చిక్కుకున్న ముగ్గురిని రక్షించినట్లు అధికారులు తెలిపారు. అక్కడ పని చేస్తున్న మరికొంతమంది కార్మికులు ఇంకా మట్టిలోనే ఉన్నారా అనే కోణంలో తీవ్రంగా గాలింపు చర్యలు కొనసాగుతున్నాయి. వర్షం నిరంతరాయంగా కురుస్తుండటంతో సహాయక చర్యలకు ఆటంకం కలగకుండా ఉండేందుకు అదనపు రెస్క్యూ బృందాలను కూడా రంగంలోకి దించారు.