ఐసీసీ టీ20 వరల్డ్ కప్ 2026 జరుగుతున్న వేళ భారత క్రికెట్ వర్గాల నుండి ఒక దిగ్భ్రాంతికర వార్త వెలుగులోకి వచ్చింది. టీమ్ ఇండియా స్టార్ క్రికెటర్ తన భార్య నుండి విడాకులు తీసుకున్నారు. యుజ్వేంద్ర చాహల్, హార్దిక్ పాండ్యా తర్వాత ఇప్పుడు రాహుల్ చహర్ కూడా తన వైవాహిక బంధాన్ని తెంచుకుంటున్నట్లు ప్రకటించడంతో అభిమానులు షాక్‌కు గురయ్యారు.
సన్‌రైజర్స్ హైదరాబాద్ (SRH) మాజీ ఆటగాడు, 26 ఏళ్ల రాహుల్ చహర్.. తన భార్య ఇషానీ జోహార్‌తో విడాకులు తీసుకున్నట్లు ఫిబ్రవరి 20, శుక్రవారం నాడు ఇన్‌స్టాగ్రామ్ ద్వారా అధికారికంగా వెల్లడించారు. వీరి వివాహం మార్చి 9, 2022న గోవాలో అట్టహాసంగా జరిగింది. దాదాపు మూడున్నర ఏళ్ల పాటు కలిసి ఉన్న ఈ జంట, ఇప్పుడు తమ బంధానికి స్వస్తి పలికారు.
రాహుల్ చహర్ భావోద్వేగ పోస్ట్: రాహుల్ సోషల్ మీడియాలో తన మనసులోని మాటలను పంచుకుంటూ.. “నేను చాలా చిన్న వయసులోనే పెళ్లి నిర్ణయం తీసుకున్నాను. ఆ సమయంలో నాకు నా గురించి, నా ప్రాధాన్యతల గురించి పూర్తి అవగాహన లేదు. గడిచిన కొన్నేళ్లు నాకు ఊహించని పాఠాలను నేర్పాయి. నేడు నా జీవితంలోని ఆ అధ్యాయం అధికారికంగా ముగిసింది. దీని కోసం నేను భారీ మూల్యం చెల్లించుకున్నాను. కానీ ఇప్పుడు నా మనసు ప్రశాంతంగా ఉంది” అని పేర్కొన్నారు.
కొన్ని బంధాలు శాశ్వతంగా ఉండవని, అవి మనకు ఏదో ఒకటి నేర్పడానికే వస్తాయని ఆయన అభిప్రాయపడ్డారు. ప్రస్తుతం తాను మరింత పరిణతి సాధించానని, ఆత్మగౌరవం మరియు ప్రశాంతతతో కొత్త జీవితాన్ని ప్రారంభించాలనుకుంటున్నానని రాహుల్ తెలిపారు.
IPL 2026 పై దృష్టి: రాజస్థాన్‌కు చెందిన ఈ లెగ్ స్పిన్నర్ ఇప్పుడు తన కెరీర్‌పై దృష్టి సారించనున్నారు. ఐపీఎల్ 2026 వేలంలో మొదట అమ్ముడుపోని రాహుల్, ఆ తర్వాత జరిగిన యాక్సిలరేటెడ్ రౌండ్‌లో చెన్నై సూపర్ కింగ్స్ (CSK) జట్టుకు ₹5.20 కోట్లకు అమ్ముడయ్యారు. అంతకుముందు సన్‌రైజర్స్ హైదరాబాద్ ఇతడిని విడుదల చేసింది. ఇప్పుడు ధోనీ సేనలో చేరిన రాహుల్ చహర్ తన సెకండ్ ఇన్నింగ్స్‌ను ఘనంగా ప్రారంభించాలని భావిస్తున్నారు.