గుజరాత్లోని నవాపుర ప్రాంతంలో 40 ఏళ్ల వివాహితపై ఆమె మామ మరియు ఆడబిడ్డ భర్త (బావ) కలిసి పదేపదే లైంగిక దాడికి పాల్పడిన షాకింగ్ ఘటన వెలుగులోకి వచ్చింది. బాధితురాలు తన మామ, బావ మరియు స్వయంగా తన భర్తపై నవాపుర పోలీస్ స్టేషన్లో ఎఫ్ఐఆర్ (FIR) నమోదు చేసింది. ఈ విషయాన్ని బయటపెడితే తన ప్రైవేట్ ఫోటోలను సోషల్ మీడియాలో వైరల్ చేస్తానని భర్త బెదిరించాడని ఆమె ఫిర్యాదులో పేర్కొంది.
ఏమి జరిగింది? బాధితురాలికి 2024 ఫిబ్రవరిలో వివాహం జరిగింది. పెళ్లయిన కొద్ది కాలానికే సంతానం కలగకపోవడంతో వైద్య పరీక్షలు చేయించగా, భర్తలో వీర్యకణాల లోపం ఉన్నట్లు తేలింది. ఐవీఎఫ్ (IVF) చికిత్స విఫలమవడంతో, బాధితురాలు ఒక బిడ్డను దత్తత తీసుకుందామని కోరింది. కానీ, ఆ కుటుంబ సభ్యులు అందుకు అంగీకరించలేదు.
ఈ పరిస్థితిని ఆసరాగా చేసుకుని, 2024 జూలైలో ఆ యువతి నిద్రిస్తున్న సమయంలో మామ ఆమె గదిలోకి చొరబడి లైంగిక దాడి చేశాడు. భర్తకు ఈ విషయం చెప్పగా, అతను కనీసం మానవత్వం చూపకుండా, “నాకు ఎలాగైనా సంతానం కావాలి, ఈ విషయాన్ని ఎవరికీ చెప్పొద్దు” అని అడ్డుపడ్డాడు. ఒకవేళ నోరు విప్పితే ఆమె నగ్న చిత్రాలను బయటపెడతానని బెదిరించాడు. భర్త మద్దతు లేకపోవడంతో, ఆ యువతి మామ చేతిలో నిరంతరం వేధింపులకు గురైంది.
ఆ తర్వాత, 2024 డిసెంబర్లో ఆడబిడ్డ భర్త (బావ) కూడా ఆమెపై లైంగిక దాడికి పాల్పడ్డాడు. ఈ క్రమంలో ఆమె గర్భం దాల్చినప్పటికీ, జూలైలో దురదృష్టవశాత్తు గర్భస్రావం (Miscarriage) జరిగింది. ఈ అమానవీయ హింసను భరించలేక, బాధితురాలు జూలై నెలాఖరులో పోలీసులను ఆశ్రయించింది. నవాపుర పోలీసులు నిందితులపై కేసు నమోదు చేసి, తీవ్రంగా విచారణ జరుపుతున్నారు.