వైశాలి/పాట్నా: బిహార్‌లోని వైశాలి జిల్లాలో మానవత్వం మంటగలిసిపోయింది. రక్షణగా ఉండాల్సిన మరిదే రాక్షసుడిగా మారాడు. ఇంట్లో ఎవరూ లేని సమయం చూసి గర్భిణి అని కూడా చూడకుండా వదినపై అఘాయిత్యానికి ప్రయత్నించాడు. ఆమె ప్రాణ పణంగా పోరాడి అడ్డుకోవడంతో, కక్షతో గొంతు నులిమి కిరాతకంగా చంపేశాడు. అంతటితో ఆగక, ఈ నేరాన్ని ఇతరులపైకి నెట్టేందుకు స్వయంగా పోలీసులకే ఫోన్ చేసి నాటకమాడాడు.
రాష్ట్రవ్యాప్తంగా సంచలనం సృష్టించిన ఈ దారుణ ఘటన వివరాలు ఇలా ఉన్నాయి:
- అదును చూసి అటాక్: వైశాలి జిల్లా మౌనా విషన్‌పూర్ గ్రామానికి చెందిన రాధా కుమారి భర్త దీపక్ పటేల్ పూణేలో కూలీ పనులు చేస్తున్నాడు. రాధా తన ఇద్దరు పిల్లలతో కలిసి గ్రామంలో ఉంటోంది. ఆదివారం మధ్యాహ్నం ఇంట్లో ఉన్న వారంతా పొలం పనులకు వెళ్లడంతో ఆమె ఒంటరిగా ఉంది. ఇదే అదునుగా భావించిన పక్కింటి మరిది సాహిల్ పటేల్ ఇంట్లోకి చొరబడ్డాడు.
- ప్రతిఘటించిందని ప్రాణం తీశాడు: రాధాపై లైంగిక దాడికి సాహిల్ ప్రయత్నించగా, ఆమె గట్టిగా ప్రతిఘటించింది. దీంతో ఆగ్రహానికి గురైన ఆ ఉన్మాది.. ఇంట్లో ఉన్న తాడుతో ఆమె గొంతును గట్టిగా బిగించి చంపేశాడు. మృతురాలు 3 నెలల గర్భిణి అని తెలియడంతో స్థానికులు కన్నీరుమున్నీరవుతున్నారు.
- పోలీసులకే ఫోన్ చేసి ‘డ్రామా’: హత్య చేసిన తర్వాత సాహిల్ అతి తెలివి ప్రదర్శించాడు. పోలీసులకు తానే ఫోన్ చేసి.. రాధా అనుమానాస్పద స్థితిలో చనిపోయిందని చెప్పాడు. ఈ హత్యను ఆమె అత్తమామలపైకి నెట్టి, తాను అమాయకుడిగా బయటపడాలని ప్లాన్ చేశాడు.
- మొబైల్ డేటాతో దొరికిపోయాడు: అయితే పోలీసుల విచారణలో సాహిల్ పాచికలు పారలేదు. రాధా మొబైల్ ఫోన్ రికార్డులను పరిశీలించగా.. సాహిల్ ఆమెకు పదేపదే ఫోన్ చేసినట్లు, సుదీర్ఘంగా మాట్లాడినట్లు సాంకేతిక ఆధారాలు దొరికాయి. దీంతో పోలీసుల అనుమానం సాహిల్ వైపు మళ్లింది.
- పరారీలో నిందితుడు: ఎస్‌డీపీఓ గోపాల్ మండల్ నేతృత్వంలోని బృందం ఘటనా స్థలాన్ని పరిశీలించింది. రాధా గొంతుపై గాయాలు స్పష్టంగా కనిపిస్తున్నాయని, ఇది పక్కాగా హత్యేనని పోలీసులు ప్రాథమికంగా నిర్ధారించారు. ప్రస్తుతం నిందితుడు సాహిల్ పరారీలో ఉండగా, అతని కోసం పోలీసులు గాలింపు చర్యలు ముమ్మరం చేశారు.
నిండు గర్భిణి అని కూడా చూడకుండా ఇంతటి కిరాతకానికి పాల్పడిన నిందితుడిని ఉరితీయాలని మృతురాలి బంధువులు, గ్రామస్థులు డిమాండ్ చేస్తున్నారు.