గోవాలో నేటికీ గంభీరంగా కనిపిస్తున్న 300 ఏళ్ల నాటి పోర్చుగీస్ భవనాలు వారి వలస పాలనను మనకు గుర్తుచేస్తాయి. వీరు భారతదేశానికి రావడానికి ముఖ్య కారణం వాస్కోడగామా. చాలామంది ఆయన భారతదేశాన్ని కనిపెట్టారని భావిస్తారు, కానీ ఆయన అప్పటికే ఉన్న వ్యాపారానికి ఒక కొత్త సముద్ర మార్గాన్ని మాత్రమే కనుగొన్నారు. ఆయనను ఒక గొప్ప సాహసిగా ప్రపంచం కొనియాడినా, ఆయన చేసిన క్రూరకృత్యాలు చాలామందికి తెలియవు.
కొత్త సముద్ర మార్గం ఎందుకు? యూరోపియన్లకు మిరియాలు, దాల్చినచెక్క వంటి సుగంధ ద్రవ్యాల అవసరం చాలా ఉండేది. వీటిని అరబ్బుల నుండి అధిక ధరకు కొనేవారు. యుద్ధాల కారణంగా భూమార్గం మూతపడటంతో, అరబ్బుల ప్రమేయం లేకుండా నేరుగా భారత్‌కు రావడానికి కొత్త మార్గం కోసం అన్వేషణ మొదలైంది.
ప్రయాణం – భారత్‌కు రాక: జులై 8, 1497న మూడు ఓడలతో వాస్కోడగామా తన ప్రయాణాన్ని ప్రారంభించాడు. దారిలో ఎదురైన తుఫానులకు భయపడిన నావికులను కఠినంగా బెదిరించి ముందుకు నడిపించాడు. మే 20, 1498న ఆయన కేరళలోని కాలికట్ (కోజికోడ్) తీరానికి చేరుకున్నాడు. అక్కడ రాజు జామోరిన్ ఆయనను ఆహ్వానించాడు. కానీ వాస్కోడగామా రాజుకు ఇచ్చిన సాదాసీదా బహుమతులను చూసి సభలోని వారు నవ్వుకున్నారు. అరబ్బులను కాదని తమకే వ్యాపార హక్కులు ఇవ్వాలన్న కామా కోరికను రాజు తిరస్కరించాడు. దీంతో కోపంతో తిరిగి వెళ్తూ కొంతమంది భారతీయులను అపహరించుకుపోయాడు.
క్రూరమైన దాడులు: 1502లో 20 యుద్ధనౌకలు, వేలమంది సైనికులతో మళ్ళీ భారత్‌కు వచ్చిన కామా వికృత రూపాన్ని ప్రదర్శించాడు. మెక్కా నుండి వస్తున్న ఒక ఓడలోని 300 మంది ప్రయాణికులను కనికరం లేకుండా సజీవ దహనం చేశాడు. కాలికట్ నగరంపై ఫిరంగులతో దాడి చేసి, అమాయక మత్స్యకారులను చంపి తన అధికారాన్ని చాటుకున్నాడు.
హింస మరియు వంచన ద్వారా ఇతర దేశాలను ఆక్రమించే తంత్రాన్ని యూరోపియన్లకు నేర్పింది వాస్కోడగామానే. 1524లో వైస్రాయ్‌గా మళ్ళీ భారత్‌కు వచ్చి మలేరియా జ్వరంతో మరణించాడు. యూరోపియన్ల దృష్టిలో ఆయన వీరుడు కావచ్చు, కానీ భారతీయుల దృష్టిలో ఆయన ఒక కరుడుగట్టిన నియంత అనేది చారిత్రక సత్యం.