న్యూఢిల్లీ, : దేశంలో వాహన నిబంధనలు రోజురోజుకూ కఠినతరం అవుతున్నాయి. తాజాగా వాహనదారులను కలవరపెట్టే ఒక కొత్త నిబంధన అమల్లోకి వచ్చింది. మీ వాహనానికి ప్రభుత్వం నిర్దేశించిన ‘హై సెక్యూరిటీ రిజిస్ట్రేషన్ ప్లేట్’ (HSRP) లేకపోతే, ఇకపై మీరు వాహన కాలుష్య పరీక్ష ధృవీకరణ పత్రం (PUC) పొందలేరు. అంతేకాకుండా, ఈ నిబంధన ఉల్లంఘిస్తే ఏకంగా రూ.10,000 వరకు జరిమానా విధిస్తామని రవాణా శాఖ తీవ్ర హెచ్చరికలు జారీ చేసింది.
అసలు ఏంటో ఈ HSRP? ఎందుకు అంత ముఖ్యం?
HSRP అంటే వాహనాల భద్రత కోసం ప్రత్యేకంగా రూపొందించిన నంబర్ ప్లేట్. సాధారణ ప్లేట్లలా దీన్ని సులభంగా తొలగించడం లేదా మార్చడం సాధ్యం కాదు.
- ప్రత్యేకతలు: ఇందులో లేజర్ ద్వారా ముద్రించిన యూనిక్ ఐడెంటిఫికేషన్ నంబర్, క్రోమియం ఆధారిత హలోగ్రామ్ మరియు ఇంధన రకాన్ని సూచించే స్టిక్కర్లు ఉంటాయి.
- లక్ష్యం: వాహనాల దొంగతనాలను అరికట్టడం, నేరాలకు పాల్పడే వాహనాలను సులభంగా గుర్తించడం మరియు రోడ్డు పర్యవేక్షణను మెరుగుపరచడమే ఈ నంబర్ ప్లేట్ ముఖ్య ఉద్దేశం.
పాత వాహనదారులకే అసలు చిక్కు!
ఏప్రిల్ 1, 2019 తర్వాత కొనుగోలు చేసిన వాహనాలకు షోరూమ్ స్థాయిలోనే ఈ HSRP అమర్చబడుతోంది. అయితే, అంతకంటే ముందు కొన్న పాత వాహనాలకు కూడా ఈ ప్లేట్ తప్పనిసరి అని ప్రభుత్వం పదేపదే హెచ్చరించినా, సుమారు 70 శాతం మంది వాహనదారులు ఇంకా పాత ప్లేట్లతోనే తిరుగుతున్నారు. వీరిపై కొరడా ఝుళిపించేందుకే ప్రభుత్వం ఇప్పుడు కొత్త రూల్ తెచ్చింది. HSRP లేని పాత వాహనాలకు పొల్యూషన్ సర్టిఫికేట్ ఇవ్వవద్దని ప్రభుత్వం స్పష్టమైన ఆదేశాలు జారీ చేసింది.
జరిమానా బాదుడు.. రూ.10,000 ఎలా?
- మొదటి తప్పు: వాహనానికి HSRP లేనందుకు మొదటిసారి రూ.5,000 ఫైన్ విధిస్తారు.
- రెండోసారి: ఇదే తప్పు పునరావృతమైతే జరిమానా రూ.10,000 కి పెరుగుతుంది.
- అదనపు పెనాల్టీ: HSRP లేకపోయినా, పొల్యూషన్ సర్టిఫికేట్ గడువు ముగిసినా వాహనం నడిపితే, ఆ సర్టిఫికేట్ లేనందుకు మరో రూ.10,000 ఫైన్ పడుతుంది. ప్రస్తుతం ఉత్తరప్రదేశ్లో ఏఐ (AI) కెమెరాలు, పెట్రోల్ బంకుల్లోని స్కానర్ల ద్వారా నేరుగా ఆన్లైన్ చలాన్లు పంపుతున్నారు.
మరిన్ని కష్టాలు ఇవే!
నంబర్ ప్లేట్ మార్చకపోతే కేవలం ఫైన్ మాత్రమే కాదు, ఇతర పనుల్లోనూ ఆటంకాలు ఎదురవుతాయి:
- RTO సేవలు: వాహనం ఆర్సీ (RC) రెన్యూవల్ లేదా ఓనర్షిప్ మార్పిడి పనులు జరగవు.
- ఇన్సూరెన్స్: బీమా పునరుద్ధరణలో ఇబ్బందులు వస్తాయని ఇన్సూరెన్స్ రెగ్యులేటరీ (IRDAI) హెచ్చరించింది.
బుక్ చేసుకోవడం చాలా ఈజీ!
భారీ జరిమానాల నుండి తప్పించుకోవడానికి ఆన్లైన్ ద్వారా హెచ్ఎస్ఆర్పీ కోసం దరఖాస్తు చేసుకోవచ్చు. మీ వాహనం ఇంజిన్ నంబర్, ఛాసిస్ నంబర్ వివరాలతో SIAM వెబ్సైట్లో బుక్ చేసుకోవచ్చు.
- ఫీజు: ద్విచక్ర వాహనాలకు రూ.200 నుండి రూ.500, కార్లకు రూ.600 నుండి రూ.1,500 వరకు మాత్రమే ఉంటుంది.