చెన్నై: తమిళనాడు రాజకీయ చరిత్రలో ఒక కొత్త శకం ఆరంభమైంది. మే 9, 2026న చెన్నైలోని నెహ్రూ ఇండోర్ స్టేడియంలో జరిగిన భారీ బహిరంగ సభలో, ‘తమిళగ వెట్రి కళగం’ (TVK) అధినేత సి. జోసెఫ్ విజయ్ (Vijay) తమిళనాడు కొత్త ముఖ్యమంత్రిగా ప్రమాణ స్వీకారం చేశారు. తమిళనాడు గవర్నర్ ఆయనతో పదవీ స్వీకార ప్రమాణం మరియు రహస్య విధి నిర్వహణ ప్రమాణం చేయించారు.
ఈ చారిత్రాత్మక ఘట్టం ద్వారా విజయ్ పలు రికార్డులను సృష్టించారు. 1967 తర్వాత, అంటే ద్రవిడ పార్టీల (DMK) పాలన మొదలైనప్పటి నుండి, అసెంబ్లీకి ఎన్నికైన మొదటి ఎన్నికల్లోనే ముఖ్యమంత్రి పీఠాన్ని అధిష్టించిన రెండో వ్యక్తిగా ఆయన ఘనత సాధించారు. అంతకుముందు, 2001లో మాజీ ముఖ్యమంత్రి జయలలిత పదవికి దూరమైనప్పుడు, మొదటిసారి ఎమ్మెల్యేగా ఉన్న ఓ. పన్నీర్ సెల్వం ముఖ్యమంత్రిగా బాధ్యతలు చేపట్టడం గమనార్హం.
అంతేకాకుండా, తమిళనాడులో అత్యున్నతమైన ముఖ్యమంత్రి పదవిని చేపట్టిన మైనారిటీ మతానికి (క్రైస్తవ) చెందిన తొలి వ్యక్తిగా కూడా విజయ్ చరిత్ర సృష్టించారు. మతాలకు అతీతంగా అన్ని వర్గాల ప్రజల మద్దతు పొందిన విజయ్ ప్రమాణ స్వీకారం, తమిళ రాజకీయాల్లో ఒక కొత్త మార్పుకు నాందిగా కనిపిస్తోంది.
ప్రమాణ స్వీకారం తర్వాత ఈరోజు (మే 10) సెక్రటేరియట్కు వెళ్లిన ముఖ్యమంత్రి విజయ్, ప్రజ సంక్షేమానికి సంబంధించిన కీలక దస్త్రాలపై సంతకాలు చేశారు. ఆయన ఈ కొత్త ప్రయాణం తమిళనాడు ప్రజలకు ఎటువంటి ప్రయోజనాలను చేకూరుస్తుందోనని దేశమంతా ఆసక్తిగా గమనిస్తోంది.