ప్రస్తుత కాలంలో విడాకులు అనేది చాలా సాధారణమైపోయింది. ఉదయం ప్రేమ, మధ్యాహ్నం పెళ్లి, సాయంత్రం విడాకులు అన్నట్లుగా పరిస్థితులు మారాయి. సాధారణంగా దంపతులు విడాకుల కోసం వరకట్న వేధింపులు లేదా కుటుంబ కలహాలను కారణంగా చూపుతారు. కానీ మధ్యప్రదేశ్కు చెందిన ఒక మహిళ విడాకులు పొందడానికి చేసిన సాహసం ఎవరూ ఊహించని విధంగా ఉంది. తన భర్త నుండి ఎలాగైనా విడిపోవాలని పంతం పట్టిన ఆమె, భర్త సొంత చెల్లెలిని కోర్టులో రెండో భార్యగా చిత్రించింది. ఈ వింత కేసు ఇప్పుడు మధ్యప్రదేశ్ హైకోర్టు గ్వాలియర్ బెంచ్ ముందుకు చేరింది.
సంసారంలో చిచ్చు పెట్టిన మార్కెటింగ్ ఉద్యోగం! మార్కెటింగ్ కంపెనీలో అధికారిగా పనిచేస్తున్న వ్యక్తితో 1998లో ఈ మహిళకు వివాహమైంది. భర్త పని నిమిత్తం ఎక్కువగా ఇంటికి దూరంగా ఉండటంతో దంపతుల మధ్య విభేదాలు మొదలయ్యాయి. ఈ గొడవలు ముదిరి 2015 నుండి ఆమె భర్తకు దూరంగా నివసించడం ప్రారంభించింది. ఎలాగైనా విడాకులు కావాలని ఆమె పట్టుబట్టింది.
చెల్లెలిని రెండో భార్యగా చిత్రించిన భార్య! 2021లో ఈ మహిళ ఫ్యామిలీ కోర్టులో విడాకుల కోసం దరఖాస్తు చేస్తూ, తన భర్త రెండో వివాహం చేసుకున్నాడని తీవ్ర ఆరోపణ చేసింది. దీనికి ఆధారంగా ఒక కుటుంబ ఫోటోను కోర్టుకు సమర్పించింది. ఆ ఫోటోలో భర్త తన చెల్లెలు మరియు బంధువులతో కలిసి ఉన్నాడు. కానీ ఈ తెలివైన మహిళ, ఆ ఫోటోలో ఉన్న భర్త సొంత చెల్లెలిని అతని ‘రెండో భార్య’ అని న్యాయమూర్తి ముందు అబద్ధం చెప్పింది!
ఏకపక్షంగా విడాకులు ఇచ్చిన కోర్టు! మహిళ ఇచ్చిన ఫోటోనే అంతిమ సాక్ష్యంగా నమ్మిన గ్వాలియర్ ఫ్యామిలీ కోర్టు, భర్తకు తన వాదన వినిపించే అవకాశం ఇవ్వకుండానే ఏకపక్షంగా విడాకులు మంజూరు చేసింది. ఈ విషయం భర్తకు తెలియనే తెలియదు. ఏప్రిల్ మొదటి వారంలో విడాకుల తీర్పు వచ్చినప్పుడు భర్త తీవ్ర దిగ్భ్రాంతికి గురయ్యాడు.
హైకోర్టును ఆశ్రయించిన భర్త తన చెల్లెలిని భార్యగా చూపి, అబద్ధాలతో విడాకులు పొందిన విషయాన్ని సవాలు చేస్తూ భర్త ఇప్పుడు హైకోర్టును ఆశ్రయించాడు. ప్రభుత్వ న్యాయవాది ధర్మేంద్ర శర్మ తెలిపిన వివరాల ప్రకారం, భార్య దొంగ పత్రాలను సమర్పించి కోర్టును గందరగోళానికి గురిచేసిందని భర్త ఫిర్యాదు చేశాడు. ఇప్పుడు హైకోర్టు ఈ వింత కేసు విచారణను చేపట్టింది. అబద్ధపు సాక్ష్యాల ఆధారంగా వచ్చిన పాత తీర్పు రద్దయ్యే అవకాశం కనిపిస్తోంది.
విడాకులు పొందడానికి మహిళ అనుసరించిన ఈ మార్గం న్యాయ వ్యవస్థను వెక్కిరించినట్లుగా ఉంది. అబద్ధాలు చెప్పి కొంతకాలం గెలిచినా, అంతిమంగా సత్యమే బయటపడుతుందని ఈ ఘటన నిరూపిస్తోంది.