ముంబై: విచారణ కోసం వెళ్లిన పోలీసులు మరియు మహారాష్ట్ర సెక్యూరిటీ ఫోర్స్ (MSF) జవాన్పై ఒక గుంపు దాడి చేసిన ఘటన శనివారం రాత్రి ఘాట్కోపర్లో చోటుచేసుకుంది. ఈ ఘటనకు సంబంధించి ఘాట్కోపర్ పోలీసులు 30 నుండి 40 మంది గుర్తుతెలియని వ్యక్తులపై కేసు నమోదు చేశారు.
అసలేం జరిగింది? శనివారం రాత్రి ఘాట్కోపర్ పోలీస్ స్టేషన్ పరిధిలో పోలీసులు గస్తీ నిర్వహిస్తుండగా వారికి ఒక ఫోన్ కాల్ వచ్చింది. నిత్యానంద్ నగర్లోని హాజీ ముల్లా చాల్ వద్ద ఒక వ్యక్తిని కొట్టడానికి పెద్ద ఎత్తున జనం గుమిగూడారని సమాచారం అందింది. వెంటనే పోలీసులు అక్కడికి చేరుకున్నారు. ఇద్దరు బాలికలపై అఘాయిత్యానికి పాల్పడిన ఒక వ్యక్తి ఇంట్లో దాక్కున్నాడని, అతడిని తమకు అప్పగించాలని అక్కడ ఉన్న జనం పోలీసులతో వాగ్వాదానికి దిగారు.
పోలీసులపై దాడి: పోలీసులు నిందితుడిని అదుపులోకి తీసుకుని బయటకు తీసుకువస్తుండగా, అక్కడున్న 30-40 మంది ఒక్కసారిగా అతనిపై దాడికి దిగారు. పోలీసులు నిందితుడిని రక్షించే ప్రయత్నం చేయగా, ఆగ్రహించిన జనం పోలీసులపై కూడా దాడి చేశారు. ఈ క్రమంలో ఒక వ్యక్తి పోలీస్ కానిస్టేబుల్ కోలి తలపై హెల్మెట్తో బలంగా కొట్టాడు. అలాగే మహారాష్ట్ర సెక్యూరిటీ ఫోర్స్ జవాన్ ఖందారేను కూడా పిడిగుద్దులతో, కాళ్లతో తన్నారు.
పోలీసులు అతి కష్టమ్మీద నిందితుడిని అక్కడి నుండి బయటకు తీసుకువచ్చి పోలీస్ వాహనంలో ఎక్కించారు. ఆ సమయంలో కూడా జనం పోలీస్ వాహనంపై రాళ్లతో, హెల్మెట్లతో దాడి చేశారు. హెల్మెట్తో కొట్టడం వల్ల కానిస్టేబుల్ కోలి తలకు తీవ్ర గాయమైంది. ప్రస్తుతం పోలీసులు నిందితులను గుర్తించే పనిలో ఉన్నారు.