ప్రముఖ భారతీయ ఆర్టిస్ట్ మిథాలీ సాల్తే, ఆమె భాగస్వామి తన్మయ్ అద్వికర్ కలిసి ‘లైవ్ ఇండియన్ పెయింటర్’ (Live Indian Painter) అనే పేరుతో చిత్రకళా ప్రదర్శనలు చేస్తుంటారు.
ముఖ్యంగా, వివాహ వేడుకల్లో జరిగే ఘట్టాలను వధూవరుల కళ్లముందే అప్పటికప్పుడు లైవ్ కాన్వాస్‌పై బొమ్మగా గీసి అబ్బురపరచడం వీరి ప్రత్యేకత. 2018లో మొదలైన వీరి ఈ కళా ప్రయాణం ఎందరో ప్రశంసలను అందుకుంటోంది.
ఈ క్రమంలో, ఎప్పటిలాగే విమానంలో ప్రయాణిస్తున్న మిథాలీకి ఆ ప్రశాంతమైన వాతావరణం ఓ కొత్త ఆలోచనను ఇచ్చింది. తనకు దొరికిన ప్రయాణ సమయాన్ని వృథా చేయకుండా, విమానం కిటికీ అద్దాన్ని ఓ కొత్త కాన్వాస్‌గా మార్చాలనుకుంది. ముందుగా పెన్సిల్‌తో అవుట్‌లైన్ గీసి, ఆ తర్వాత దానిపై రంగులు అద్దడంతో.. చివరికి అక్కడ ఓ అందమైన వినాయకుడి రూపం ప్రాణం పోసుకుంది. ఈ అద్భుతమైన దృశ్యాన్ని ఆమె తన ఇన్‌స్టాగ్రామ్ ఖాతాలో “ప్రయాణంలో ఓ కొత్త కాన్వాస్ దొరికింది” అనే క్యాప్షన్‌తో పోస్ట్ చేయగా, అది ఇంటర్నెట్‌లో దావానలంలా వ్యాపించడం మొదలైంది.
ఇన్‌స్టాగ్రామ్‌లో విడుదలైన ఈ వీడియో, కొద్ది గంటల్లోనే ‘ఎక్స్’ (ట్విట్టర్) వేదికకూ పాకి వైరల్ అయింది. ఇది చూసిన నెటిజన్లు తీవ్ర దిగ్భ్రాంతికి, ఆగ్రహానికి గురయ్యారు.
“ప్రభుత్వ ఆస్తిని ఇలా పాడుచేస్తారా?”, “ఇది చాలా అసహ్యకరమైన పని, ఈమెకు జరిమానా విధించి అరెస్ట్ చేయాలి!” అంటూ పలువురు మండిపడ్డారు. మరికొందరైతే, “విమానం టేకాఫ్ అయ్యేటప్పుడు, ల్యాండ్ అయ్యేటప్పుడు బయటి వెలుతురు కనిపించేలా కిటికీ తెరిచి ఉండాలి; ఇది ప్రయాణికుల భద్రతతో చెలగాటమాడటమే” అని పేర్కొంటూ, ఆ ఆర్టిస్ట్‌పై విమాన ప్రయాణ నిషేధం విధించాలని తీవ్రంగా విమర్శించారు
విమర్శలు శృతిమించడంతో మిథాలీ తన ఇన్‌స్టాగ్రామ్ పోస్ట్ కామెంట్ సెక్షన్‌లో వివరణ ఇచ్చింది. “ఎవరూ కంగారు పడకండి, ఆ బొమ్మను విమానం అద్దంపై నేరుగా గీయలేదు; అది ఒక ‘ట్రాన్స్‌పరెంట్ షీట్’ (పారదర్శకమైన కాగితం)” అని స్పష్టం చేసింది. తాను ఆ షీట్ పైనే బొమ్మ గీశానని నిరూపించడానికి, ఆ కాగితాన్ని చేతిలో పట్టుకుని ఉన్న ఓ ఫోటోను కూడా ఆమె విడుదల చేసి వివాదానికి తెరదించింది.
విమానం కిటికీ అద్దాన్ని ఎవరూ పాడుచేయలేదని, అది కేవలం కాంతి ప్రసరించే పారదర్శక కాగితంపై వేసిన పెయింటింగ్ అని తెలియడంతో నెటిజన్ల ఆగ్రహం క్రమంగా చల్లారింది. ఒక చిన్న వీడియో ఎంత పెద్ద అపార్థానికి దారితీసిందో చూడండి!
Leave a Reply