మహారాష్ట్రలోని పుణె నగరంలో, ఉగ్రవాద నిరోధక విభాగం (ATS) అధికారిగా నటిస్తూ 75 ఏళ్ల రిటైర్డ్ ఉద్యోగిని ‘డిజిటల్ అరెస్ట్’ పేరుతో బెదిరించి.. ఆయన నుంచి ఏకంగా రూ. 8 లక్షలు కొల్లగొట్టిన షాకింగ్ ఘటన వెలుగులోకి వచ్చింది.
పదవీ విరమణ తర్వాత శేష జీవితం కోసం పైసా పైసా కూడబెట్టుకున్న మొత్తాన్ని ఒకే ఒక్క ఫోన్ కాల్‌తో ఆ వృద్ధుడు పోగొట్టుకున్న ఉదంతం స్థానికంగా తీవ్ర విషాదాన్ని, సంచలనాన్ని రేపింది. పుణెకు చెందిన ఆ 75 ఏళ్ల వృద్ధుడికి గుర్తుతెలియని వ్యక్తి ఫోన్ చేసి, తాను ఏటీఎస్ సీనియర్ అధికారినంటూ పరిచయం చేసుకున్నాడు.
“మీ పేరు మీద విదేశాలకు పంపిన పార్శిల్‌లో నిషేధిత వస్తువులు, మాదకద్రవ్యాలు (డ్రగ్స్) ఉన్నట్లు గుర్తించాం. మీపై ఉగ్రవాద నిరోధక చట్టం, మనీలాండరింగ్ కింద కేసులు నమోదయ్యాయి” అని చెబుతూ వృద్ధుడిని తీవ్ర భయాందోళనలకు గురిచేశాడు.
అంతటితో ఆగకుండా వాట్సాప్ వీడియో కాల్ చేసి, “కేసు దర్యాప్తు పూర్తయ్యే వరకు మిమ్మల్ని ఇంట్లోనే ‘డిజిటల్ అరెస్ట్’ చేస్తున్నాం. కెమెరా ముందు నుంచి కదిలినా లేదా స్థానిక పోలీసులకు సమాచారం ఇచ్చినా తక్షణమే జైలుకు పంపుతాం” అని బెదిరించి ఆయనను తీవ్ర మానసిక ఒత్తిడికి గురిచేశాడు.
కేసు నుంచి బయటపడాలన్నా, అరెస్టును తప్పించుకోవాలన్నా తనిఖీ ఛార్జీల (వెరిఫికేషన్ ఫీజు) కింద తమ ఖాతాకు వెంటనే డబ్బులు పంపాలని ఆ నకిలీ అధికారి హుకుం జారీ చేశాడు. దీంతో తీవ్ర భయాందోళనకు లోనైన ఆ వృద్ధుడు, తాను జీవితాంతం దాచుకున్న రూ. 8 లక్షల మొత్తాన్ని ఆన్‌లైన్ ద్వారా కేటుగాళ్లు చెప్పిన బ్యాంకు ఖాతాకు బదిలీ చేశాడు.
డబ్బులు జమకాగానే అవతలి వ్యక్తులు కాల్ కట్ చేశారు. ఆ తర్వాతే తాను మోసపోయానని గ్రహించిన బాధితుడు లబోదిబోమంటూ పుణె సైబర్ క్రైమ్ పోలీసులను ఆశ్రయించి ఫిర్యాదు చేశాడు. ఈ ఘటనపై కేసు నమోదు చేసుకున్న పోలీసులు, నకిలీ ఏటీఎస్ అధికారులుగా నటిస్తూ వృద్ధుడిని నిలువునా ముంచిన ముఠా కోసం గాలింపు ముమ్మరం చేశారు.
Leave a Reply