భారతదేశంలో ప్రస్తుతం పెళ్లిళ్ల సీజన్ నడుస్తోంది. ఈ క్రమంలో సోషల్ మీడియాలో భారతీయ వివాహాలకు సంబంధించిన రకరకాల వీడియోలు వైరల్ అవుతుంటాయి. సాధారణంగా కాలేజీ రోజుల్లో చాలామంది యువకులు ఆహ్వానం లేకపోయినా సరదాగా పెళ్లిళ్లకు వెళ్లి భోజనం చేసి వస్తుంటారు. భారతీయ సంస్కృతిలో ‘అతిథి దేవో భవ’ అన్నట్లుగా అతిథులను దైవ సమానంగా గౌరవిస్తారనే విషయం మనందరికీ తెలిసిందే. తాజాగా ఒక విదేశీ జంటకు కూడా సరిగ్గా ఇలాంటి అనుభవమే ఎదురైంది.
మనసు నింపేసే వీడియో: వైరల్ అవుతున్న ఈ వీడియోలో ఒక విదేశీ జంట ఆహ్వానం లేకుండానే ఒక భారతీయ పెళ్లి వేడుకలోకి వెళ్లడం చూడవచ్చు. లోపలికి వెళ్లగానే వారిని ఎవరూ బయటకు పంపలేదు సరే కదా, అత్యంత సాదరంగా ఆహ్వానించారు. ఇది చూసి ఆ విదేశీ జంట ఆశ్చర్యపోయింది. వారు లోపలికి వెళ్లగానే మొదట నుదుట తిలకం దిద్ది సాంప్రదాయబద్ధంగా ఆహ్వానం పలికారు. ఆ తర్వాత వారు డిజె (DJ) ఫ్లోర్‌పై అందరితో కలిసి ఉత్సాహంగా డ్యాన్స్ చేశారు.
రోడ్డుపై నడుచుకుంటూ వెళ్తున్న ఆ జంటకు డోలు వాయిద్యాలు, పాటలు వినిపించడంతో కుతూహలంతో లోపలికి వెళ్లారు. మొదట వారు కొంచెం సంకోచించినా, పెళ్లి వారు వారిని తమలో ఒకరిగా కలిపేసుకుని డ్యాన్స్ ఫ్లోర్‌పైకి తీసుకెళ్లారు. భారతీయ సంస్కృతిలోని గొప్పతనాన్ని ఈ దృశ్యం అద్దం పడుతోంది. వారి ముఖాల్లోని చిరునవ్వు ఈ అనుభవం పట్ల వారు ఎంత సంతోషంగా ఉన్నారో చెబుతోంది. ఈ వీడియోను ‘duncan.mcnaught’ అనే ఇన్‌స్టాగ్రామ్ ఖాతాలో షేర్ చేశారు.