వ్యాపారంలో భారీ నష్టం.. ఉద్యోగం కూడా పోయింది.. “జీవితం ముగిసిపోయింది” అంటూ రోడ్డుపక్కన కన్నీళ్లు పెట్టుకున్న వ్యక్తి.. కారు ఆపి ధైర్యం చెప్పిన నిషిత.. వీడియో చూసి చలించిపోయిన నెటిజన్లు!

గోవాకు పర్యటనకు వెళ్లిన ఓ మహిళ.. రోడ్డుపక్కన కూర్చుని బోరున ఏడుస్తున్న వ్యక్తిని చూసి తన కారును ఆపి అతడికి అండగా నిలిచిన ఘటన సోషల్ మీడియాలో వైరల్‌గా మారింది.

కథనం ప్రకారం.. వ్యాపారంలో భారీగా నష్టపోవడంతో ఆ వ్యక్తి తీవ్ర ఆవేదనకు గురైనట్లు తెలుస్తోంది. అదే సమయంలో అతడు తన ఉద్యోగాన్ని కూడా కోల్పోయినట్లు సమాచారం. దీంతో జీవితంలో ఇక ఏమీ మిగల్లేదన్న భావనతో రోడ్డుపక్కన కూర్చుని కన్నీళ్లు పెట్టుకున్నాడు.

అదే సమయంలో అటుగా కారులో వెళ్తున్న నిషిత అనే మహిళ.. రోడ్డుపక్కన ఓ వ్యక్తి బోరున ఏడుస్తుండటాన్ని గమనించారు. వెంటనే కారు ఆపి అతడి వద్దకు వెళ్లి ఏం జరిగిందని అడిగారు.

తన జీవితంలో ఎదురైన సమస్యలను ఆమెతో చెప్పుకుంటూ ఆ వ్యక్తి కన్నీళ్లు పెట్టుకున్నాడు. దీంతో నిషిత అతడికి ధైర్యం చెబుతూ.. పరిస్థితులు ఎప్పటికీ ఇలాగే ఉండవని, కష్టాల నుంచి బయటపడే అవకాశం ఉంటుందని ఓదార్చారు.

అంతేకాదు.. అతడి కన్నీళ్లు తుడుచుకునేందుకు నాప్‌కిన్లు ఇచ్చారు. ఏదైనా తినడానికి కొనుక్కోవాలని చెప్పడంతో పాటు.. తనకు చేతనైనంత సహాయం చేస్తానని భరోసా ఇచ్చారు. అతడికి కొంత ఆర్థిక సహాయం కూడా చేసినట్లు సమాచారం.

ఇద్దరూ తమ ఫోన్ నంబర్లను కూడా ఒకరికొకరు ఇచ్చుకున్నట్లు తెలుస్తోంది. భవిష్యత్తులో కూడా అతడికి అవసరమైనప్పుడు మాట్లాడేందుకు, అండగా ఉండేందుకు నిషిత ముందుకొచ్చారు.

ఈ ఘటనకు సంబంధించిన వీడియోను నిషిత తన సోషల్ మీడియా ఖాతాలో షేర్ చేశారు.

“ప్రతి ప్రయాణం కేవలం అందమైన ప్రదేశాలను చూడటం కోసం మాత్రమే కాదు.. మనం కలవాల్సిన మనుషులను కలవడం కోసం కూడా ఉంటుంది” అనే సందేశంతో ఆమె ఈ వీడియోను పోస్ట్ చేశారు.

ఈ వీడియో సోషల్ మీడియాలో వైరల్ కావడంతో.. కష్టాల్లో ఉన్న ఓ అపరిచితుడిని చూసి పట్టించుకోకుండా వెళ్లిపోకుండా, కారు ఆపి అతడికి ధైర్యం చెప్పడంతో పాటు చేతనైన సహాయం చేసిన నిషిత మానవత్వాన్ని నెటిజన్లు ప్రశంసిస్తున్నారు.

కొన్నిసార్లు పెద్ద సహాయం చేయాల్సిన అవసరం ఉండదు.. ఓ నాలుగు మంచి మాటలు, కాసేపు మన పక్కన నిలబడే మనిషి కూడా తీవ్ర నిరాశలో ఉన్న వ్యక్తికి ఎంతో ధైర్యాన్ని ఇవ్వగలడని ఈ ఘటన గుర్తుచేస్తోంది.