ఆరోగ్య విభాగం: ఆధునిక జీవనశైలి, ఆహారపు అలవాట్ల వల్ల నేడు చాలామందిని వేధిస్తున్న ప్రధాన సమస్య ‘హై కొలెస్ట్రాల్’. ఇది ఒక నిశ్శబ్ద హంతకి (Silent Killer) లాంటిది. రక్తంలో చెడు కొలెస్ట్రాల్ స్థాయిలు పెరిగినప్పుడు అది సైలెంట్గా ధమనులను మూసివేసి, ప్రాణాంతకమైన గుండెపోటుకు దారితీస్తుంది. అయితే, మన శరీరం ముందే కొన్ని సంకేతాల ద్వారా మనల్ని హెచ్చరిస్తుంది. ఆ లక్షణాలను సకాలంలో గుర్తిస్తే ముప్పు నుంచి తప్పించుకోవచ్చు.
అసలు కొలెస్ట్రాల్ అంటే ఏమిటి?
కొలెస్ట్రాల్ అనేది మన శరీర కణాలు, హార్మోన్ల తయారీకి అవసరమైన ఒక మైనం వంటి పదార్థం. దీనిని కాలేయం ఉత్పత్తి చేస్తుంది. ఇందులో రెండు రకాలు ఉంటాయి:
- మంచి కొలెస్ట్రాల్ (HDL): ఇది గుండెకు రక్షణ ఇస్తుంది.
- చెడు కొలెస్ట్రాల్ (LDL): ఇది రక్త నాళాల్లో పేరుకుపోయి రక్త ప్రసరణకు అడ్డంకులు కలిగిస్తుంది. దీని స్థాయి పెరిగితేనే ప్రమాదం.
అవగణించకూడని ఆ 6 లక్షణాలు ఇవే:
1. గుండెలో అసౌకర్యం లేదా నొప్పి: రక్తంలో ఎల్డీఎల్ (LDL) పెరిగినప్పుడు గుండెకు రక్తాన్ని సరఫరా చేసే ధమనుల్లో అడ్డంకులు ఏర్పడతాయి. దీనివల్ల ఛాతీలో ఒత్తిడి లేదా నొప్పి వస్తుంది. ఈ నొప్పి కొన్నిసార్లు మెడ, దవడ లేదా చేతులకు కూడా పాకుతుంది. ఇది గుండెపోటుకు ప్రాథమిక సంకేతం కావచ్చు.
2. చర్మంపై పసుపు రంగు గడ్డలు (Xanthomas): కొలెస్ట్రాల్ మోతాదు మించినప్పుడు అది చర్మం కింద పసుపు రంగులో లేదా మైనంలాంటి చిన్న చిన్న గడ్డల రూపంలో పేరుకుపోతుంది. ముఖ్యంగా కనురెప్పల పైన, మోచేతులు, మోకాళ్లపై ఇవి కనిపిస్తాయి. వీటిని వైద్య పరిభాషలో ‘క్సాంతోమాస్’ అంటారు.
3. శ్వాస తీసుకోవడంలో ఇబ్బంది: ధమనుల సామర్థ్యం తగ్గడం వల్ల గుండె రక్తాన్ని పంపింగ్ చేయడానికి ఎక్కువ శ్రమించాల్సి వస్తుంది. దీనివల్ల శరీర కణజాలాలకు ఆక్సిజన్ అందదు. ఫలితంగా కొంచెం నడిచినా లేదా విశ్రాంతి తీసుకుంటున్నా కూడా ఆయాసం, శ్వాస ఆడకపోవడం వంటివి జరుగుతాయి.
4. కాళ్లు, చేతుల్లో తిమ్మిర్లు: రక్త నాళాల్లో కొలెస్ట్రాల్ పేరుకుపోవడం వల్ల కాళ్లు, చేతులకు రక్త ప్రసరణ తగ్గుతుంది. దీనివల్ల తరచుగా కాళ్లు తిమ్మిర్లు పట్టడం, స్పర్శ కోల్పోవడం వంటివి జరుగుతాయి. మెదడుకు వెళ్లే రక్త ప్రసరణ ఆగితే అది పక్షవాతం (Stroke) కింద మారే ప్రమాదం ఉంది.
5. విపరీతమైన అలసట: కండరాలకు, అవయవాలకు అవసరమైన పోషకాలు, ఆక్సిజన్ రక్త ప్రసరణ ద్వారా అందకపోతే శరీరం త్వరగా అలసిపోతుంది. నిద్రపోయినా, విశ్రాంతి తీసుకున్నా తగ్గని ఈ నిస్సత్తువ కొలెస్ట్రాల్ పెరుగుదలకు సంకేతం. ముఖ్యంగా హార్మోన్ల మార్పుల వల్ల మహిళల్లో మెనోపాజ్ తర్వాత ఈ సమస్య ఎక్కువగా కనిపిస్తుంది.
6. పాదాల్లో చల్లదనం: రక్త ప్రసరణ సరిగా లేకపోవడం వల్ల శరీర ఉష్ణోగ్రతలో మార్పులు వస్తాయి. ఇతర అవయవాల కంటే పాదాలు ఎప్పుడూ చల్లగా అనిపిస్తుంటే కొలెస్ట్రాల్ పరీక్ష చేయించుకోవడం ఉత్తమం.