డయానా (పేరు మార్చబడింది) అనే 28 ఏళ్ల యువతి ఒక పార్టీలో అనుకోకుండా తన స్నేహితుడితో శారీరక సంబంధం పెట్టుకుంది. కొన్ని వారాల తర్వాత ప్రెగ్నెన్సీ టెస్ట్ పాజిటివ్ రావడంతో ఆమె దిగులు చెందింది. వెంటనే సోషల్ మీడియాలో సెర్చ్ చేసి, డాక్టర్ సలహా లేకుండానే ఆన్లైన్లో ‘మిఫెప్రిస్టోన్’ అనే అబార్షన్ మాత్రను ఆర్డర్ చేసి వేసుకుంది. కొద్దిరోజుల తర్వాత ఆమె సమస్య తీరిపోయినప్పటికీ, ఇలాంటి పద్ధతి ప్రాణాపాయమని అమెరికా కోర్టు ఇప్పుడు హెచ్చరించింది.
అమెరికాలో డయానా వంటి వేలాది మంది మహిళలు డాక్టర్ల పర్యవేక్షణ లేకుండానే మెయిల్ ద్వారా అబార్షన్ మాత్రలు తెప్పించుకుంటున్నారు. దీనిపై విచారణ చేపట్టిన అమెరికా కోర్టు, ఈ సులభమైన దారికి తాత్కాలికంగా బ్రేక్ వేసింది.
కోర్టు తీర్పు ఏమిటి?
లూసియానా రాష్ట్రం దాఖలు చేసిన పిటిషన్పై విచారణ చేపట్టిన అమెరికా అప్పీల్ కోర్టు, ఇకపై మహిళలు డాక్టర్ ప్రిస్క్రిప్షన్ లేకుండా అబార్షన్ మాత్రలను ఆన్లైన్ లేదా మెయిల్ ద్వారా తెప్పించుకోకూడదని ఆదేశించింది. ఈ మాత్రలు కావాలంటే వ్యక్తిగతంగా ఫార్మసీకి వెళ్లి తీసుకోవాల్సి ఉంటుంది.
ఏమిటి ఈ మిఫెప్రిస్టోన్ (Mifepristone)?
ఇది మెడికల్ అబార్షన్ కోసం వాడే ప్రధాన ఔషధం.
- ఇది శరీరంలోని ప్రొజెస్టిరాన్ హార్మోన్ను నిలిపివేసి గర్భాశయ పొరను విచ్ఛిన్నం చేస్తుంది.
- ఇది తీసుకున్న 24-48 గంటల తర్వాత ‘మిసోప్రోస్టోల్’ మాత్ర వేసుకోవాలి.
- 70 రోజుల లోపు గర్భాన్ని తొలగించడానికి ఇది 99.6% సమర్థవంతంగా పనిచేస్తుంది.
- FDA దీనిని 2000వ సంవత్సరంలోనే ఆమోదించింది.
వివాదం ఎందుకు మొదలైంది?
2022లో అమెరికాలోని పలు రాష్ట్రాల్లో అబార్షన్పై ఆంక్షలు విధించారు. అయితే మహిళలు టెలీ-హెల్త్ లేదా మెయిల్ ద్వారా ఈ మాత్రలను ఇంటికే తెప్పించుకోవడం మొదలుపెట్టారు. దీనివల్ల అమెరికాలో అబార్షన్ల సంఖ్య తగ్గకపోగా, ఏకంగా 60 శాతం పెరిగింది. డాక్టర్ పర్యవేక్షణ లేకుండా ఈ మాత్రలు వాడటం ప్రాణాలకే ప్రమాదమని అబార్షన్ వ్యతిరేక బృందాలు వాదిస్తున్నాయి.
భారత్పై దీని ప్రభావం ఉంటుందా?
నిపుణుల అభిప్రాయం ప్రకారం, అమెరికా కోర్టు తీర్పు ప్రభావం భారత్పై ఉండదు. ఎందుకంటే:
- కఠిన నిబంధనలు: భారత్లో ఇప్పటికే అబార్షన్ మాత్రలపై కఠిన నిబంధనలు ఉన్నాయి. డాక్టర్ ప్రిస్క్రిప్షన్ లేకుండా ఈ మాత్రలు ఇవ్వడం చట్టరీత్యా నేరం.
- షెడ్యూల్ H ఔషధం: భారత్లో మిఫెప్రిస్టోన్ మరియు మిసోప్రోస్టోల్ రెండూ ‘షెడ్యూల్ H’ జాబితాలో ఉన్నాయి. అంటే వీటిని డాక్టర్ అనుమతి పత్రం ఉంటేనే ఫార్మసీలు విక్రయించాలి.
- MTP చట్టం: భారత్లో మెడికల్ టర్మినేషన్ ఆఫ్ ప్రెగ్నెన్సీ (MTP) చట్టం 1971 (2021లో సవరించబడింది) ప్రకారం 9 వారాల (63 రోజులు) వరకు మెడికల్ అబార్షన్ చట్టబద్ధం. అయితే అది ఖచ్చితంగా రిజిస్టర్డ్ డాక్టర్ పర్యవేక్షణలోనే జరగాలి.