రాంపూర్: ఉత్తర ప్రదేశ్లోని రాంపూర్ జిల్లాలో శోభనం రాత్రి జరిగిన ఒక విస్తుపోయే ఘటన వెలుగులోకి వచ్చింది. ఇక్కడ పెళ్లయిన మొదటి రాత్రి పెళ్లికూతురికి కళ్ళు తిరగడంతో, పెళ్లికొడుకు ఏకంగా ప్రెగ్నెన్సీ టెస్ట్ కిట్ తీసుకువచ్చాడు.
ఆ తర్వాత ఏం జరిగిందో తెలిస్తే ఆశ్చర్యపోతారు. అసలు విషయం ఏంటో వివరంగా చూద్దాం.
రాంపూర్లో శనివారం ఒక యువకుడికి వివాహం జరిగింది. ఊరేగింపు ముగిసిన తర్వాత సాయంత్రం వధువు అత్తారింటికి చేరుకుంది. ఆచారాల ప్రకారం ఆమెకు ఘన స్వాగతం పలికారు. అప్పట్లో ఎండలు కూడా తీవ్రంగా ఉన్నాయి. శోభనం కోసం వధువు, వరుడు గదిలోకి వెళ్లారు. ఈ క్రమంలో వధువుకు ఒక్కసారిగా కళ్ళు తిరిగాయి. అపస్మారక స్థితిలో ఉన్న భార్యకు సహాయం చేయడానికి బదులు, వరుడు ఊరిలోని ఒక మెడికల్ స్టోర్ నుండి ప్రెగ్నెన్సీ టెస్ట్ కిట్ కొనుగోలు చేసి తెచ్చాడు. ఆమె స్పృహలోకి రాగానే దానిని ఆమె ముందు పెట్టాడు. ఈ చర్యతో వధువు ఒక్కసారిగా అగ్గిమీద గుగ్గిలమైంది.
రంగంలోకి కుటుంబ సభ్యులు
శోభనం రాత్రి భర్త తన చేతికి కిట్ ఇచ్చి పరీక్ష చేసుకోమనగానే వధువుకు తీవ్ర కోపం వచ్చింది. ఆమె వెంటనే తన వదినకు ఫోన్ చేసి, తన భర్త తనను అనుమానిస్తున్నాడని, గతంలో ఎవరితోనో సంబంధం ఉందంటున్నాడని వాపోయింది. వదిన ఈ విషయాన్ని సీరియస్గా తీసుకుని కుటుంబ సభ్యులందరికీ చెప్పింది. కొద్దిసేపటికే వధువు తరపు వారు వరుడి ఇంటికి చేరుకున్నారు.
కళ్ళు ఎందుకు తిరిగాయి?
పెళ్లి పనుల వల్ల వచ్చిన అలసట, బయట ఉన్న విపరీతమైన ఎండ మరియు ఉక్కపోత కారణంగా వధువుకు కళ్ళు తిరిగాయి. అది చూసి వరుడు భయపడి వెంటనే తన స్నేహితులకు ఫోన్ చేశాడు. వారు సరదాగా (మజాక్) ఇది గర్భవతి అయ్యే లక్షణం కావచ్చని చెప్పారు. ఆ అయోమయంలోనే వరుడు రాత్రికి రాత్రే ప్రెగ్నెన్సీ కిట్ తీసుకువచ్చాడు.
పంచాయితీలో తేలిన పంచాయితీ
వధువు తరపు వారు రాగానే ఇరువర్గాల మధ్య వాగ్వాదం మొదలైంది. పరిస్థితి విషమించకుండా ఊరి పెద్దలు జోక్యం చేసుకుని ఇరుపక్షాలకు నచ్చజెప్పారు. గ్రామంలో పంచాయితీ ఏర్పాటు చేశారు, అది సుమారు రెండు గంటల పాటు సాగింది. చివరకు వరుడు తన తప్పును ఒప్పుకుని వధువుకు, ఆమె కుటుంబ సభ్యులకు క్షమాపణలు చెప్పాడు. భవిష్యత్తులో ఇలాంటి ప్రవర్తన ఉండదని అందరి ముందు ప్రమాణం చేయడంతో వివాదం ముగిసింది.