సంగీత లోకంలో ఒక శకం ముగిసింది.. లతా, ఆశాల స్మృతిలో హృదయనాథ్ సంచలన నిర్ణయం! ఆసియాలోనే అతిపెద్ద ఆసుపత్రి నిర్మాణానికి శ్రీకారం!

ముంబై: భారతీయ సంగీత సామ్రాజ్యంలో ఒక సువర్ణ అధ్యాయం ముగిసింది. గాన కోకిల లతా మంగేష్కర్ నిష్క్రమణ తర్వాత, ఆమె సోదరి, దిగ్గజ గాయని ఆశా భోస్లే కూడా ఈ లోకాన్ని వీడటం యావత్ కళా ప్రపంచాన్ని శోకసంద్రంలో ముంచెత్తింది. ఏప్రిల్ 12, 2026న ఆశా తాయ్ తుదిశ్వాస విడవడంతో మంగేష్కర్ కుటుంబంలోనే కాకుండా, సంగీత ప్రియుల గుండెల్లో తీరని లోటు ఏర్పడింది. తన 70 ఏళ్ల సుదీర్ఘ కెరీర్‌లో 20 భాషల్లో 12,000 పైగా పాటలు పాడి మెప్పించిన ఆశా భోస్లే జ్ఞాపకార్థం మంగేష్కర్ కుటుంబం ఇప్పుడు ఒక చారిత్రాత్మక సేవా కార్యక్రమానికి పూనుకుంది.

సోదరీమణుల జ్ఞాపకార్థం ఆసియాలోనే అతిపెద్ద హాస్పిటల్!

లతా మంగేష్కర్, ఆశా భోస్లేల గౌరవార్థం ఆసియాలోనే అతిపెద్ద ఆసుపత్రిని నిర్మించనున్నట్లు వారి సోదరుడు హృదయనాథ్ మంగేష్కర్ అధికారికంగా ప్రకటించారు. ఈ సందర్భంగా ఆయన మాట్లాడుతూ.. “మా అక్కాచెల్లెళ్ల స్మృతిలో ఆసియాలోనే అతిపెద్ద వైద్యాలయాన్ని నిర్మించడమే మా లక్ష్యం. దీని కోసం ఇప్పటికే భారీ స్థలాన్ని సేకరించాము. మిగిలినదంతా భగవంతుడిపై భారం వేసి పనులు మొదలుపెట్టాము” అని తెలిపారు. ఈ ఆసుపత్రికి ‘లతా-ఆశా ఇన్‌స్టిట్యూట్ ఆఫ్ మెడికల్ సైన్సెస్’ లేదా ‘లతా-ఆశా మంగేష్కర్ ఆయుర్విజ్ఞాన సంస్థాన్’ అని పేరు పెట్టే అవకాశం ఉంది.

సంగీత వారసత్వం కోసం అద్భుత మ్యూజియం:

వైద్య సేవలతో పాటు, మంగేష్కర్ కుటుంబం యొక్క అద్భుత సంగీత ప్రస్థానాన్ని భావి తరాలకు అందించేందుకు ఒక భారీ ‘మ్యూజియం’ (సంగ్రహాలయం) కూడా నిర్మించనున్నారు. ఇక్కడ ప్రజలు మంగేష్కర్ కుటుంబ సభ్యుల అరుదైన వస్తువులను, వారి ప్రయాణాన్ని చూడటమే కాకుండా.. అత్యాధునిక (Interactive) పద్ధతుల్లో సంగీతాన్ని అభ్యసించే అవకాశం కూడా కల్పిస్తారు. కళతో పాటు ఆరోగ్యంలోనూ ఆ ఇద్దరు సోదరీమణుల పేరు అజరామరం కావాలన్నదే ఈ ప్రాజెక్ట్ ప్రధాన ఉద్దేశం.

భావోద్వేగానికి గురైన హృదయనాథ్:

ఆసుపత్రి వివరాలను వెల్లడిస్తూ హృదయనాథ్ మంగేష్కర్ భావోద్వేగానికి గురయ్యారు. “పేదలకు వైద్యం అందించేందుకు ఈ నగరంలోనే ఒక ఆసుపత్రి కట్టాలని లతా దీదీ 25 ఏళ్ల క్రితమే నిశ్చయించుకున్నారు. దురదృష్టవశాత్తు ఆమె ఇప్పుడు మన మధ్య లేరు. కానీ ఆమె ప్రేరణతో మొదలవుతున్న ఈ ఆసుపత్రి ఇప్పుడు ఆమె పేరుతోనే పిలవబడుతుంది. నిజానికి ఈ నెల 16న దీని ప్రారంభోత్సవం జరగాల్సి ఉంది. కానీ ఈలోపే ఆశా దీదీ కూడా మరణించారు. అందుకే ఇప్పుడు ఈ ఆసుపత్రిని లతా, ఆశా ఇద్దరి పేరు మీద నిర్మించాలని నిర్ణయించాం” అని వివరించారు.

సంగీతంతో కోట్లాది మంది మనసులను గెలుచుకున్న మంగేష్కర్ సోదరీమణులు, ఇప్పుడు ఈ ఆసుపత్రి రూపంలో లక్షలాది మందికి ప్రాణదానం చేయబోతున్నారు.