హైదరాబాద్లోని సరూర్ నగర్ (Saroornagar) పరిధిలో వెలుగులోకి వచ్చిన ఈ వినూత్న దొంగతనం ఘటన, దొంగలు ఎంత నెక్స్ట్ లెవెల్ స్కెచ్ వేస్తున్నారో చూపిస్తోంది.
కిందపడిపోతున్నట్లు బైక్ డ్రామా
రోడ్డుపై ఒక వ్యక్తి సాధారణంగా నడుచుకుంటూ వెళ్తున్నాడు. ఆ సమయంలో అతనికి కొద్దిగా ముందుకు బైక్పై వచ్చిన ఒక అపరిచిత వ్యక్తి, ఒక్కసారిగా బండి నియంత్రణ కోల్పోయి కింద పడిపోతున్నట్లు నాటకమాడాడు. అయ్యో.. బైక్ కింద పడిపోతుందేమోననే మంచి ఉద్దేశంతో (గుడ్ సమరిటన్), నడుచుకుంటూ వెళ్తున్న వ్యక్తి వెంటనే పరుగెత్తుకుంటూ వెళ్లి ఆ బైక్ను పట్టుకుని కింద పడకుండా ఆపాడు.
కొన్ని సెకన్ల గ్యాప్.. ఫోన్ మాయం!
దొంగల మాస్టర్ ప్లాన్:
సదరు వ్యక్తి బైక్ను పట్టుకుని సహాయం చేస్తున్న ఆ కొన్ని సెకన్ల గ్యాప్లోనే.. వెనుక నుండి నడుచుకుంటూ వచ్చిన మరొక దొంగ, బైక్ లేపడానికి సహాయం చేస్తున్న వ్యక్తి జేబులో చేతులు జొరబెట్టాడు. అతని పాకెట్లో ఉన్న సుమారు ₹1 లక్ష విలువైన ఖరీదైన మొబైల్ ఫోన్ను చాలా చాకచక్యంగా నొక్కేశాడు.
ఫోన్ కొట్టేసిన మరుక్షణమే, బైక్ స్టార్ట్ చేసి సిద్ధంగా ఉన్న మొదటి దొంగతో కలిసి ఇద్దరూ అదే బండిపై మెరుపు వేగంతో అక్కడి నుండి పరారయ్యారు.
బాధితుడి లబోదిబో
ఆ దొంగలిద్దరూ కళ్లముందే బైక్పై స్పీడ్గా వెళ్ళిపోయిన తర్వాత గానీ.. తన జేబులోని ఫోన్ దొంగతనానికి గురైందనే విషయం ఆ అమాయక బాధితుడికి అర్థం కాలేదు. ఈ వినూత్న దొంగతనంపై బాధితుడు పోలీసులకు ఫిర్యాదు చేయగా.. కేసు నమోదు చేసిన పోలీసులు స్థానిక సీసీటీవీ (CCTV) ఫుటేజ్ ఆధారంగా ఆ కేటుగాళ్ల కోసం గాలిస్తున్నారు.