విమాన ప్రయాణంలో 77 ఏళ్ల వృద్ధుడు ఒకరు కృత్రిమ మేధస్సు (AI) యాప్ అయిన చాట్‌జీపీటీ (ChatGPT)ని అత్యంత గౌరవంగా ‘సార్’ అని పిలుస్తూ, ఒక కొత్త బిజినెస్ ప్లాన్ రూపొందించిన ఘటన సోషల్ మీడియాలో విశేష స్పందన పొందుతోంది.
తన పక్కనే కూర్చున్న ఆ వృద్ధుడిని గమనించిన ఒక టెక్ నిపుణుడు, ఆయన ‘వర్టికల్ ఫార్మింగ్’ (నిలువు వ్యవసాయం) కు సంబంధించిన కొత్త వ్యాపార ప్రణాళిక గురించి చాట్‌జీపీటీతో తీవ్రంగా చర్చిస్తుండటం చూసి ఆశ్చర్యపోయాడు.
సాధారణంగా రోబోలకు కమాండ్స్ ఇచ్చినట్లు కాకుండా, చాట్‌జీపీటీ ఇచ్చిన సమాధానాలకు “చాలా అద్భుతమైన మార్గదర్శకత్వం సార్… మీకు చాలా కృతజ్ఞతలు, మళ్లీ మిమ్మల్ని సంప్రదిస్తాను సార్…” అని సాటి మనుషులతో మాట్లాడుతున్నట్లుగా ఆ వృద్ధుడు ‘సార్’ అని సంబోధిస్తూ మర్యాదపూర్వకంగా సంభాషించాడు.
ఈ ఆసక్తికరమైన సంఘటనను ఆ టెక్ నిపుణుడు తన ఎక్స్ (X/Twitter) ఖాతాలో పంచుకున్నాడు. విమాన ప్రయాణం ముగిసే సమయానికి వారిద్దరూ వ్యాపారం, టెక్నాలజీ గురించి మాట్లాడుకుని మంచి స్నేహితులుగా మారిపోయారని ఆయన సంతోషంగా పేర్కొన్నాడు.
ఈ పోస్ట్ వైరల్ కావడంతో, 77 ఏళ్ల వయసులోనూ కొత్త టెక్నాలజీని నేర్చుకోవాలనే ఆ వృద్ధుడి ఆసక్తిని, ఆయన సంస్కారాన్ని నెటిజన్లు ప్రశంసిస్తున్నారు. భవిష్యత్తులో ఏఐ రోబోలు మనుషులపై దాడి చేసినా, ఇతని మర్యాదపూర్వకమైన ప్రవర్తన చూసి ఇతన్నేమీ చేయవని కొందరు సరదాగా కామెంట్లు కూడా పెడుతున్నారు.
Leave a Reply