వార్త: సాధారణంగా సినిమాకు వెళ్లడం అంటే దైనందిన జీవితం నుండి కాస్త విరామం తీసుకోవడం. స్నేహితులు లేదా కుటుంబ సభ్యులతో కలిసి స్నాక్స్ తింటూ పెద్ద తెరపై సినిమాను ఆస్వాదిస్తాం. కానీ సోషల్ మీడియాలో ఇప్పుడు ఒక వీడియో అందరి దృష్టిని ఆకర్షిస్తోంది. ‘ధురంధర్’ సినిమా లేట్ నైట్ షో జరుగుతుండగా ఒక వింత దృశ్యం కనిపించింది.
థియేటర్లో సినిమా నడుస్తుండగా ఒక మహిళ తన ల్యాప్‌టాప్ ఓపెన్ చేసి పని చేస్తూ కనిపించింది. పని ఒత్తిడి వ్యక్తిగత సమయాన్ని కూడా మింగేస్తోందా? లేక అది ఏదైనా అత్యవసర పరిస్థితా? అనే చర్చకు ఈ వీడియో దారితీసింది.
థియేటర్లో ‘కార్పొరేట్ మజ్దూర్’ ఒక కంటెంట్ క్రియేటర్ షేర్ చేసిన ఈ వీడియోలో.. రాత్రి 11 గంటల షోకు వచ్చిన ఒక మహిళ, సినిమా చూడటం మానేసి తన పనిలో నిమగ్నమై ఉంది. చీకటి థియేటర్లో ఆమె ల్యాప్‌టాప్ స్క్రీన్ వెలుతురు అందరికీ స్పష్టంగా కనిపిస్తోంది. ఈ వీడియోకు “హే భగవాన్, వచ్చే జన్మలో నన్ను కార్పొరేట్ మజ్దూర్ (కార్పొరేట్ కూలీ)ని చేయకు” అనే క్యాప్షన్ ఇచ్చారు.
సోషల్ మీడియాలో భిన్న స్పందనలు: ఈ వీడియోపై నెటిజన్లు రకరకాలుగా స్పందిస్తున్నారు:
- వర్క్-లైఫ్ బ్యాలెన్స్: “ప్రజలు క్షణాన్ని ఆస్వాదించడం మర్చిపోయారు. పని అంత ముఖ్యమైతే ముందే ముగించుకుని సినిమాకు రావాలి. హైటెక్ సిటీలో నేను సినిమా చూస్తున్నప్పుడు థియేటర్ అంతా సైలెంట్‌గా ఉంది, అది సినిమా హాలా లేక మీటింగ్ రూమా అనిపించింది” అని ఒకరు రాశారు.
- సివిక్ సెన్స్: “చీకటిగా ఉన్న థియేటర్లో ల్యాప్‌టాప్ వెలుతురు ఇతరులకు ఇబ్బంది కలిగిస్తుంది. కనీస విజ్ఞత కూడా లేకపోతే ఎలా?” అని మరొకరు మండిపడ్డారు.
- మరో కోణం: “ప్రతిదాన్ని నెగటివ్‌గా చూడకండి. నేను వర్క్ ఫ్రమ్ హోమ్ (WFH) చేస్తూ కొండలు, పెళ్లిళ్లు, కేఫ్‌ల నుండి పని చేశాను. ఆఫీస్ లీవ్ పెట్టకుండా సినిమా చూడాలనుకునే వారికి ఇది ఒక మార్గం కావచ్చు” అని మరికొందరు అభిప్రాయపడ్డారు.
సినిమా విశేషాలు: ప్రపంచవ్యాప్తంగా ఇప్పటికే రూ. 691 కోట్లకు పైగా వసూలు చేసిన ‘ధురంధర్’ సినిమాలో రణవీర్ సింగ్, అర్జున్ రాంపాల్, సంజయ్ దత్, ఆర్. మాధవన్, సారా అర్జున్ వంటి ప్రముఖ నటులు నటించారు.