పశ్చిమ బెంగాల్లో భారతీయ జనతా పార్టీ ప్రభుత్వ ఏర్పాటుకు సన్నాహాలు మొదలయ్యాయి. శనివారం ఉదయం 10 గంటలకు సువేందు అధికారి ముఖ్యమంత్రిగా ప్రమాణ స్వీకారం చేయనున్నారు. ఈ నేపథ్యంలో అసదుద్దీన్ ఒవైసీకి చెందిన AIMIM పార్టీ నుండి తీవ్ర స్పందన వ్యక్తమైంది.
ఉత్తరప్రదేశ్ AIMIM పార్టీ ప్రతినిధి షాదాబ్ చౌహాన్, సువేందు అధికారిని ముఖ్యమంత్రిగా ఎంపిక చేయడంపై ప్రశ్నలు సంధించారు. బహిరంగంగా రాజ్యాంగాన్ని ధిక్కరించే వ్యక్తిని బీజేపీ ఎంచుకుందని ఆయన ఆరోపించారు.
సువేందు అధికారిపై AIMIM ప్రశ్నల వర్షం
సువేందు అధికారిని శాసనసభాపక్ష నేతగా ఎంపిక చేయడంపై షాదాబ్ చౌహాన్ మాట్లాడుతూ.. “ప్రజలు ఆయనను ఎన్నుకున్నారు, వారి తీర్పును మేము గౌరవిస్తాము. కానీ, బహిరంగంగా రాజ్యాంగాన్ని ధిక్కరిస్తూ, ప్రజాస్వామ్య వ్యవస్థను సవాలు చేస్తూ, ఒకే మతం గురించి మాట్లాడే వ్యక్తిని ఎంచుకోవడం దురదృష్టకరం” అని అన్నారు.
బీజేపీలో ఇతర నాయకులు కూడా ఉన్నారని, వారిని ఎంచుకోవాల్సిందని ఆయన అభిప్రాయపడ్డారు. “సువేందు అధికారి ఏ రాజ్యాంగంపై అయితే ప్రమాణం చేస్తారో, దానిని గౌరవిస్తారని నేను ఆశిస్తున్నాను. ఏ భారతీయ పౌరుడిని విదేశీయుడిగా చిత్రీకరించే కుట్రలు చేయకూడదని, అరాచకాలకు పాల్పడకుండా న్యాయం చేస్తారని భావిస్తున్నాను. ఆయన ప్రభుత్వంలో అరాచక వాతావరణం ఉండదని, కోర్టులను తన పని తాను చేసుకోనిస్తారని మరియు ‘బుల్డోజర్ రాజ్’ ఉండదని మేము నమ్ముతున్నాము” అని చౌహాన్ పేర్కొన్నారు.
నేడే సువేందు అధికారి ప్రమాణ స్వీకారం
పశ్చిమ బెంగాల్లో భారతీయ జనతా పార్టీ చారిత్రాత్మక విజయం సాధించిన సంగతి తెలిసిందే. శుక్రవారం జరిగిన బీజేపీ శాసనసభాపక్ష సమావేశంలో ఎమ్మెల్యేలందరూ ఏకగ్రీవంగా సువేందు అధికారిని తమ నాయకుడిగా ఎంచుకున్నారు. అనంతరం కేంద్ర హోం మంత్రి అమిత్ షా ఆయన పేరును అధికారికంగా ప్రకటించారు.
శనివారం ఉదయం 10 గంటలకు కోల్కతాలోని ప్రసిద్ధ బ్రిగేడ్ పరేడ్ గ్రౌండ్లో సువేందు అధికారి ముఖ్యమంత్రిగా ప్రమాణ స్వీకారం చేయనున్నారు. ఈ వేడుక అత్యంత వైభవంగా జరగనుంది. ఈ కార్యక్రమంలో ప్రధాని నరేంద్ర మోదీ, హోం మంత్రి అమిత్ షా సహా బీజేపీ, ఎన్డీయే పాలిత రాష్ట్రాల ముఖ్యమంత్రులు మరియు పలువురు సీనియర్ నాయకులు పాల్గొంటారు. భవానీపూర్ స్థానంలో మమతా బెనర్జీని ఓడించిన తర్వాత సువేందు మాట్లాడుతూ.. తనకు హిందువులందరి ఓట్లు పడ్డాయని, ముస్లింలు కూడా ఓటు వేశారని పేర్కొన్న విషయం తెలిసిందే.