ప్రయాగ్‌రాజ్: ఉత్తరప్రదేశ్ రాష్ట్రంలోని ప్రయాగ్‌రాజ్‌లో పేద మహిళలను లక్ష్యంగా చేసుకుని, వారి అండాలను (Egg Cells) చట్టవిరుద్ధంగా దొంగిలించి విక్రయిస్తున్న ఒక ముఠాను పోలీసులు అరెస్ట్ చేశారు. 15 ఏళ్ల మైనర్ బాలికకు ఆశ చూపి ఆమె అండాలను సేకరించిన ఘటనతో ఈ భారీ మోసం వెలుగులోకి వచ్చింది.
ఘటన వివరాలు: ఫఫామౌ ప్రాంతంలోని ఒక హోటల్‌లో 15 ఏళ్ల బాలిక పని చేస్తోంది. తన వద్ద మంచి సెల్ ఫోన్ లేకపోవడంతో, దానిని కొనుక్కోవడానికి డబ్బు సంపాదిస్తున్న ఆ బాలికకు.. తోటి పని చేసే ఒక స్నేహితురాలు ఒక ప్లాన్ చెప్పింది. తన తల్లి సహాయంతో ఆ బాలికను ఒక ముఠాకు పరిచయం చేసింది. ₹10,000 ఇస్తామని నమ్మించి, ఆ బాలికను ఒక ఐవీఎఫ్ (IVF) సెంటర్‌కు తీసుకెళ్లారు.
మైనర్ బాలిక నుండి అండాలను సేకరించడం చట్టరీత్యా నేరం కావడంతో, ఆ ముఠా బాలికకు ఫోర్జరీ చేసిన నకిలీ ఆధార్ కార్డును సృష్టించింది. అంతేకాకుండా ఆ బాలికకు పెళ్లయినట్లుగా తప్పుడు పత్రాలను తయారు చేసి, ఐవీఎఫ్ సెంటర్‌లో సమర్పించి చట్టవిరుద్ధంగా అండాలను సేకరించారు. ఈ విషయం తెలుసుకున్న బాలిక తల్లి పోలీసులకు ఫిర్యాదు చేయడంతో అసలు విషయం బయటపడింది.
అరెస్టయిన వారు: ఈ కేసులో బాలిక స్నేహితురాలు పలక్, ఆమె తల్లి రింకీ, సీమా భారతియా, ఆమె కుమారుడు హిమాన్షు మరియు ఐవీఎఫ్ సెంటర్ ఏజెంట్ కల్పనా భారతియా సహా మొత్తం ఐదుగురిని పోలీసులు అరెస్ట్ చేశారు. వీరు గతంలో కూడా ఇలాంటి అనేక మోసాలకు పాల్పడినట్లు విచారణలో తేలింది. నగరంలోని వివిధ ప్రాంతాల్లో ఈ ముఠాకు సంబంధాలు ఉన్నాయని, ఆర్థికంగా వెనుకబడిన మహిళలను, విద్యార్థినులను డబ్బు ఆశ చూపి ఈ ఊబిలోకి దించుతున్నారని పోలీసులు వెల్లడించారు.