సౌండ్ విషయంలో మొదలైన చిన్న గొడవ.. చివరకు వృద్ధ పూజారి రక్తమోడేలా దాడి! వైరల్‌గా మారిన సీసీటీవీ వీడియో..

జైపూర్ నగరంలోని ఓ శివాలయంలో సాయంత్రం హారతి, పూజా కార్యక్రమాలు జరుగుతున్న సమయంలో ఊహించని ఘటన చోటుచేసుకుంది. భక్తి పాటలు, భజనలు వినిపించే సౌండ్ విషయంలో మొదలైన చిన్న వివాదం చివరకు 63 ఏళ్ల వృద్ధ పూజారిపై దాడికి దారితీసింది.

ఆలయానికి సమీపంలో నివసించే ఓ యువకుడు.. ఆలయంలో భక్తి పాటలు, భజనలు ఎక్కువ శబ్దంతో వినిపిస్తున్నాయని అభ్యంతరం వ్యక్తం చేస్తూ ఆలయ ప్రాంగణంలోకి ఆగ్రహంగా వెళ్లినట్లు సమాచారం.

అక్కడ పూజా కార్యక్రమాల్లో ఉన్న 63 ఏళ్ల రామకృష్ణ అనే పూజారితో అతడు వాగ్వాదానికి దిగాడు. మొదట మాటలతో మొదలైన గొడవ.. కొద్దిసేపటికే ఘర్షణగా మారింది.

ఈ క్రమంలో ఆగ్రహానికి గురైన వ్యక్తి వృద్ధ పూజారిని బలంగా తోసి కింద పడేసి దాడి చేసినట్లు సమాచారం. అంతేకాకుండా ఆయన దుస్తులను చింపి, కాళ్లతో తన్నడంతో పాటు పిడిగుద్దులతో దాడి చేసిన దృశ్యాలు ఆలయంలోని సీసీటీవీ కెమెరాల్లో రికార్డయ్యాయి.

ప్రస్తుతం ఈ దృశ్యాలు సోషల్ మీడియాలో వైరల్‌గా మారాయి.

హారతి జరుగుతున్న సమయంలో ఆలయంలోకి ప్రవేశించి.. వయసైన వ్యక్తి అని కూడా చూడకుండా పూజారిపై దాడి చేయడం స్థానికంగా తీవ్ర ఆగ్రహానికి కారణమైంది.

ఈ ఘటనపై సమాచారం అందుకున్న కర్దాని పోలీస్ స్టేషన్ పోలీసులు.. సీసీటీవీ దృశ్యాల ఆధారంగా దర్యాప్తు ప్రారంభించారు.

పూజారి ఇచ్చిన ఫిర్యాదు ఆధారంగా.. దాడికి పాల్పడిన యువకుడితో పాటు అతని తండ్రిని కూడా పోలీసులు అదుపులోకి తీసుకుని విచారణ జరుపుతున్నట్లు సమాచారం.

ప్రశాంతంగా పూజలు జరిగే ఆలయంలోకి వచ్చి ఇలాంటి హింసకు పాల్పడటంపై భక్తులు, స్థానికులు ఆగ్రహం వ్యక్తం చేస్తున్నారు. ఇలాంటి ఘటనలకు పాల్పడేవారిపై కఠిన చర్యలు తీసుకోవాలని వారు డిమాండ్ చేస్తున్నారు.

ఈ ఘటనకు సంబంధించిన సీసీటీవీ వీడియో ప్రస్తుతం సోషల్ మీడియాలో వైరల్ కావడంతో.. ఈ వ్యవహారం స్థానికంగా తీవ్ర చర్చకు దారితీసింది.